संसार पोष्ट
भैरहवा, २५ साउन । रुपन्देहीको सिद्धार्थनगर नगरपालिकाका एक वडा अध्यक्ष वडा सरसफाई अभियानमा जुटेका छन् । वडा वासीलाई स्वास्थ्य र सरसफाई प्रति सजग र सचेत वनाउदै सरसफाई युक्त वडा वनाउने अभियानमा वडा नम्बर ४ का वडा अध्यक्ष मुक्तिनाथ यादव (भोला) लाग्नुभएको छ । यो अभियानमा वडा अध्यक्ष संगै सिंगो वडा समिति सक्रियता पुर्वक लागेको छ ।
शहरी क्षेत्रमा विभिन्न कारणले दुर्गन्ध फैलिने र यसैका कारण सबै क्षेत्रको वातावरण प्रदुषित हुने भएकाले फोहोरमैलाको व्यवस्थापनलाई महत्व दिएर वडालाई हराभरा र सरसफाई युक्त वनाउने अभियानमा आफु लागेको वडा अध्यक्ष यादवले बताउनु भयो । सरसफाई अभियान संगै आफ्नो घर वरिपरी सफा राख्न र जथाभावी फोहर नफाल्न वडावासीलाई आग्रह समेत गरिएको उहांले बताउनु भयो ।
सरसफाई अभियान अन्तर्गत शनिबार वडा समितिको आयोजनामा सिद्धार्थनगर नगरपालिका–४ स्थित जैसवाल धर्मशाला चोक देखि मायादेवी चोकसम्म वृहत सरसफाई गरिएको छ । वडा अध्यक्ष यादवको नेतृत्वमा भएको सरसफाई अभियानमा जनप्रतिनिधि, कर्मचारी, समाजसेवी तथा संघ–संस्थाका प्रतिनिधि र वडावासीको सक्रिय सहभागिता रहेको थियो ।
वडाअध्यक्ष यादव आफै कुचो लिएर सडक सरसफाईमा निस्केपछि स्थानीयले त्यसको प्रशंसा गरेका छन् ।
तत्कालिन संघीय समाजवादी फोरम नेपालबाट वडा अध्यक्षमा निर्वाचित यादव सिद्धार्थनगर नगरपालिकाका कान्छा वडा अध्यक्ष हुनुहुन्छ । २६ बर्षिय वडा अध्यक्ष यादवले आफुले पाउने पारिश्रमिक नलिई वडावासीको आवश्यकताको आधारमा विभिन्न क्षेत्रमा खर्च गर्दै आउनु भएकोछ ।
