संसार पोष्ट
बुटवल, २५ साउन । मोतिपुर स्वास्थ्य चौकीमा प्रसुती गृह वनाउन माग गरिएको छ । सो क्षेत्रका महिलाहरुको स्वास्थ्य अवस्थालाई मध्यनजर गरी गर्भवती महिलाहरुलाई स्वास्थ्य चौकीमै सुत्केरी गराउनको लागि प्रसुति गृह बनाउन आवश्यक रहेको एक कार्यक्रममा वोल्ने बक्ताहरुले बताएका हुन् ।
मोतिपुर क्षेत्रका ३ वटा वडाका जनताले स्वास्थ्य सेवा लिने स्वास्थ्य चौकीमा प्रसुति गृह नहुंदा धेरै गर्भवती महिलाहरुले समस्या भोग्नु परेको भन्दै उनीहरुले तत्काल हेल्थपोष्ट भवन संगै प्रसुति गृह बनाउनु माग गरेका हुन् ।
बुटबल उपमहानगरपालिक वडा नं १७ मा रहेको मोतिपुर स्वास्थ्य चौकीमा आयोजना गरिएको सामाजिक परिक्षण कार्यक्रममा स्वास्थ्य चौकीबाट उपलब्ध हुने स्वास्थ्य सेवा र सुविधा सबै सेवाग्राहीले देख्ने गरी नागरिक वडापत्र वनाएर राख्न पनि उनीहरुले माग गरेका छन् ।
बुटबल उपमहानगरपालिका वडा नं १७, १८ र १९ वडाका जनताले मोतिपुर स्वास्थ्य चौकीवाट स्वास्थ्य सेवा लिदै आएका छन् ।
कार्यक्रममा बोल्दै बडा नं १९ का बडा अध्यक्ष हिम बहादुर खत्रीले बुटबल नगरपालिकाले गतबर्ष नै स्वास्थ्य चौकी बनाउन जग्गा खोज्न भनेपनि अहिले सम्म केहि नभएको बताउनु भयो । एक वडा एक हेल्थपोष्टको अबधारणा लागु गर्न सम्वन्धित निकायलाई उहांले आग्रह गर्नुभयो ।
त्यस्तै वडा नं १८ का बडा अध्यक्ष हुमनाथ आचार्यले जनतालाई सहज रुपमा स्वास्थ्यसेवा उपलब्ध गराउन आबश्यकता रहेको बताउदै स्वास्थ्यलाई सेवाग्राहीको भावना अनुरुप लैजानुपर्नेमा जोड दिनुभयो ।
सामाजिक परिक्षणमा नेकपाका गंगाराम ढकाल, नेपाली काँग्रेसका ओम बहादुर घिमिरे, स्थानिय समाजसेवी भिम प्रसाद न्यौपाने, टोल बिकास संस्थाका प्रेम मस्र्यांगी, महिला स्वास्थ्य स्वयमसेबिका लगायतले बोल्दै स्वास्थ्य लाई सर्वसुलभ बनाउन आग्रह गर्नु भयो ।
बुटबल उपमहानगर जनस्वास्थ्य शाखाका जनस्वास्थ्य अधिकृत कपिल गौतमले स्वास्थ्य सेवा स्थानिय तहमा आएपछि सुरुमा केही समस्या भएपनि अहिले यो हटेको र सहज सेवा दिईरहेको बताउनु भयो ।
बुटवल उपमहानगरपालिका बडा नं १७ का वडा अध्यक्ष सन्त बहादुर रानाले हेल्थपोष्टका बिषयमा आएका समस्यालाई तत्काल समाधान गर्दै लैजाने बताउनु भयो । उहांले स्थानिय, प्रदेश र संघिय सरकारको ध्यानाकर्षण गराएर भएपनि आगामी ३ बर्ष भित्र स्वास्थ्य चौकी भवन निर्माण गर्ने प्रतिवद्धता जनाउनु भयो । स्वास्थ्य चौकी प्रमुख बिन्दु अर्यालले हेल्थपोष्टले एक बर्षमा दिएको सेवा र कर्मचारी समस्याको बारेमा जानकारी गराउनु भएको थिया ।
