भारत, अमेरिका र युरोपियन मुलुकबाट राष्ट्रियता माथि खतरा ः अध्यक्ष केसी
संसार पोष्ट
बुटवल, २५ साउन । राष्ट्रिय जमोर्चाका अध्यक्ष चित्रबहादुर केसीले भारत, अमेरिका र युरोपियन मुलुकबाट नेपालको राष्ट्रियता माथि खतरा रहेको बताउनु भएको छ । भारत, अमेरिकार र युरोपियन मुलुकलाई नेपाल चाहिएकाले उनीहरुबाट हाम्रो राष्ट्रियता खतरामा रहेको अध्यक्ष केसीको दावी छ ।
अखिल नेपाल राष्ट्रिय उद्योग व्यापार संघ रुपन्देहीको दोस्रो जिल्ला सम्मेलनको शनिवार बुटवलमा उद्घाटन गर्दै राष्ट्रियता, अखण्डता र सार्वभौमिकता बचाउन विदेशी शक्ति केन्द्रहरुसंग सजग रहनु पर्नेमा अध्यक्ष केसीले जोड दिनु भयो ।
राष्ट्रियता, अखण्डता र सार्वभौमिकता देश र जनताको लागि सबैभन्दा ठूलो सम्पति भएको उहांको भनाई छ । उहाँले नेपालमा राजनीतिक क्रान्ति पुरा नभएको बताउंदै २१ औ सताब्दीमा पनि नेपाल परनिर्भतामा गुज्रिएको बताउनु भयो ।
गास, वास, कपासका लागि नेपाली जनताले लामो समयदेखि संघर्ष गरेपनि अहिलेसम्म जनताका आधारभूत समस्या हल हुन नसकेको उहांले उल्लेख गर्नुभयो । सत्तामा रहेकाहरु विदेशी शक्ति केन्द्रहरुसंग बोल्न डराएकै कारण नेपाल अहिलेसम्म परनिर्भतामा गुज्रिएको र देशको अर्थतन्त्र झनै बिग्रिएको उहाँले बताउनु भयो । भारतको इशारामा नेपालमा भएका उद्योग कलकारखानाहरु बन्द गरिएको उल्लेख गर्दै सत्ताको लोभमा सत्तासिनहरु बोल्न डराउंदा झनै समस्या थपिएको उहाँको कथन थियो ।
शिक्षा, स्वास्थ्य, रोजगारी, राष्ट्रिय उद्योग कलकाराखाना नीजि करण गरिएकै कारण नेपाल झनै भारतसंग परनिर्भतामा बाँच्नु पर्ने अवस्थाको सिर्जना भएको उहांले बताउनु भयो ।
अध्यक्ष केसीले राष्ट्रिय उद्योगहरुको संरक्षणका लागि स्वदेशी उत्पादनलाई पहिलो प्राथमिकता दिएर विदेशी आयातलाई रोक्नुपर्ने बताउनु भयो । राज्यले नीति नियम र कार्यक्रम बनाउन सके विदेशबाट आयात हुने सामानलाई रोक्न सकिने र त्यसका लागि सत्तासिनहरुको सोंच, विचारमा परिवर्तन आउन जरुरी रहेको बताउनु भयो ।
नेपाललाई आर्थिक रुपमा स्वतन्त्र र आत्मनिर्भर देश बनाउनु पर्छ, त्यसका लागि सामूहिक राष्ट्रिय लगानीलाई प्राथमिकता दिनुपर्ने उहाँको तर्क छ । उहाँले संघीयताले काटेको घाउमा नुन, चुक थप्ने काम गरेको बताउंदै संघीयताको आवरणमा हिमाल, पहाड छोडिएको बताउनु भयो । केन्द्र र स्थानीय तहलाई बलियो बनाएर प्रदेशको संरचना खारेज गर्नुको विकल्प नभएको उहांको भनाई छ ।
नेपाल भारतको एकाधिकारको वजार भएको उल्लेख गर्दै उहांले भारतबाट आउने तरकारी, फलफुल र खाद्यान्नमा विषादी भोरेर पठाउंदा पनि सरकार बोल्न नसकेको बताउनु भयो । उहाँले सत्ता फुत्कने डरले सत्तामा रहेका दलका नेताहरु बोल्न नसकेको आरोप लगाउनु भयो ।
कम्युनिष्टको नाममा बनेको दुई तिहाई सरकार कम्युनिष्ट नभएको दावी गर्दै कम्युनिष्ट हुनका लागि निश्चित आचरण र सिद्वान्तनिष्ठ हुनुपर्ने उहाँको तर्क छ ।
कार्यक्रममा प्रदेश सभा सदस्य तारा जीसीले देशलाई आर्थिक रुपमा आत्मनिर्भर बनाउनु पर्ने र त्यसका लागि विदेशी लगानी रोक्नुपर्ने बताउनु भयो ।
अखिल नेपाल राष्ट्रिय उद्योग व्यापार संघका केन्द्रिय अध्यक्ष ढुण्डीराज पौडेलले मुलुकको आर्थिक क्रान्तिका लागि राज्यले उद्योग मैत्री नीति बनाउनु पर्ने बताउनु भयो । उहांले व्यापार घांटा बढेर अहिले १४ अर्व घांटामा रहेको बताउंदै सरकारले उद्योगी व्यवसायीका समस्या बुझ्न नसकेको गुनासो गर्नुभयो ।
