समृद्धि, सरस्वती, संस्कृति, शक्ति र साथी पाँच विधाका छात्रबृत्ति
संसार पोष्ट
बुटवल, २१ साउन । कम्प्युटर एशोसियसन नेपाल महासंघ (क्यान)ले प्राविधिक शिक्षातर्फ दिदै आएको छात्रवृत्तिलाई निरन्तरता दिएको छ ।
सूचना तथा सञ्चार प्रविधिको क्षेत्रमा काम गर्दै आइरहेको क्यानले यो पटक आइटीमा विद्यार्थी आकर्षण बढाउन १ करोड ८५ लाख ३६ हजार बराबरको छात्रबृत्ति बितरण गर्न लागेको छ । क्यान फेडेरेसन प्रदेश ५ ले मंगलबार बुटवलमा पत्रकार सम्मेलन गरी छात्रबृत्ति घोषणा गरेको हो ।
दक्ष जनशक्ति उत्पादन गर्ने लक्ष्यसहित गतवर्ष ३३ जनालाई छात्रवृति दिएको क्यानले यसवर्ष ४९ जनालाई छात्रवृति दिने भएको हो ।
पत्रकार सम्मेलनमा क्यानका केन्द्रिय वरिष्ठ उपाध्यक्ष नवराज कुवंरल आईटीमा अध्ययन गर्ने चाहना भएका विद्यार्थीहरुलाई लक्षित गरि क्यानले छात्रवृतिको कार्यक्रमलाई निरन्तरता दिएको बताउनु भयो । उहांले लर्ड बुद्ध एजुकेशन फाउण्डेनको सहकार्यमा क्यानले सातै प्रदेशका ७ जनाका दरले ४९ जना विद्यार्थीहरुलाई छात्रबृत्ति दिईने बताउनु भयो ।
कार्यक्रममा क्यानका उपाध्यक्ष रामुदेव गौतमले यसवर्ष ४९ जनालाई १ करोड ८५ लाख ३६ हजार बराबर रकमको छात्रवृति प्रदान गरिने जानकारी गराउदै प्रत्येक प्रदेशबाट ४ जनाका दरले २८ जना छात्रालाई पूर्ण छात्रवृति र आइसिटी मेरिट स्कलर्शिप प्रत्येक तीन जनाका दरले २१ जनालाई आशिक छात्रवृति प्रदान गरिने बताउनु भयो ।
मलेशियाको एसिया प्यासेफिक युनिभर्सिटी अफ टेक्नोलोजी एण्ड इनोभेसनको एफिलेसनमा संचालित लर्ड बुद्ध एजुकेशन फाउण्डेसनमा स्नातक तह अन्तरगत बिद्यार्थीहरुले बिएस्सी आईटीको अध्ययन गर्न पाउने छन् । यस्तै कक्षा १० को गणित विषयमा कम्तिमा ५० प्रतिशत अंक ल्याइ सीटीईभीटीबाट कम्प्युटर इन्जिनियरिङमा डिप्लोमा गरेकाहरुले छात्रवृत्तिका लागि आवेदन दिन सक्नेछन् ।
सो अवसरमा लर्डबुद्ध एजुकेसन फाउण्डेसनका अध्यक्ष पंकज जलानले क्यानमार्फत समृद्धि, सरस्वती, संस्कृति, शक्ति, साथी गरि पाँच प्रकारका छात्रबृत्ति दिईने बताउनु भयो । नेपाल सरकारको मान्यताप्राप्त शिक्षण संस्थाबाट ५० प्रतिशत अंकसहित प्लस टु वा सो सरह अध्ययन गरेको देशका कुनै पनि विद्यार्थीले आवेदन दिन सक्ने उहांले बताउनु भयो । साउन ३२ गते फर्म भर्ने अन्तिम दिन रहेको उहांले जानकारी दिनुभयो । गतवर्ष छात्रबृत्ति पाएका मध्ये ३३ जनाले आईटी विषय अध्ययन गरिरहेका छन् ।
