बुटवल । लुम्बिनी प्रदेश स्तरिय राष्ट्रपति रनिङ शिल्ड प्रतियोगिता आजबाट संचालन भएको छ । प्रदेश सरकारले बजेट निकासा रोकेको भन्दै अन्यौलमा परेको प्रतियोगिता प्रदेश सरकारले बजेट फुकुवा गरेपछि निर्धारित समयभन्दा एकदिन ढिला प्रतियोगिता शुरु भएको हो ।
प्रतियोगिताको आज एक समारोहका बीच लुम्बिनी प्रदेशका प्रदेश प्रमुख अमिक शेरचनले उदघाटन गरे । कार्यक्रमलाई सम्बोधन गर्दै प्रदेश प्रमुख शेरचनले युवाहरुलाई अनुशासित बनाउन र विकासमा जोड्न खेलकुद महत्वपूर्ण माध्यम हुन सक्ने बताए । उनले खेलकुदलाई मनोरञ्जन र स्वास्थ्यमा मात्र सिमित राख्न नहुने बताउँदै खेलकुदले समग्र देशको विकासमा भूमिका खेल्ने उल्लेख गरे । उनले खेलाडीहरुलाई केन्द्रीय प्रतियोगिता जितेर आउन शुभकामना पनि दिए ।
कार्यक्रममा लुम्बिनी प्रदेशसभा सदस्य भोजप्रसाद श्रेष्ठले खेलकुद दुब्र्यसनीमा लागेका युवालाई सहि मार्गमा ल्याउने मुख्य माध्यम हुन सक्ने बताए ।
प्रदेश खेलकुद परिषदका सदस्य सचिव जयप्रकाश भट्टराईको अध्यक्षतामा भएको उदघाटन समारोहमा प्रदेश सांसद सिके गुप्ता, परिषदका उपाध्यक्ष कोशिश खड्का लगायतले प्रतियोगिताको सफलताको शुभकामना ब्यक्त गरे ।
प्रतियोगिता उदघाटन सत्रमा प्रदेशप्रमुख शेरचनले ब्यालुन सहितको ब्यानर उडाउनुका साथै खेलकुद मशाल खेलाडीलाई हस्तान्तरण गरेका थिए । कार्यक्रममा निर्णायकहरुको तर्फबाट पद्मा चौधरी र खेलाडीहरुको तर्फबाट तुलसीराम थारुले सपथ ग्रहण गरेका थिए ।
प्रतियोगिता अन्तर्गत आज भएको खेलमा तेक्वाण्दो तर्फ रुपन्देही २, दाङ २ तथा बाँके र नवलपरासीले १–१ स्वर्ण जितेका छन् । त्यसैगरि एथ्लेटिक्समा बाँके ४, दाङ ३, कपिलवस्तु ३ र बर्दियाले २ स्वर्ण जितेका छन् ।
भोली सम्म सञ्चालन हुने प्रतियोगितामा प्रदेशभरिका १ हजार ८० खेलाडी र १५० अफिसियलहरु सहभागी रहेका छन् ।
