२३ चैत, बुटवल । ‘शान्ति र समृृद्धिका लागि खेलकूद’ भन्ने मूल नारासहित बुद्ध जन्मस्थल लुम्बिनीमा लुम्बिनी पीस हाफ् म्याराथन प्रतियोगिता सुरु भएको छ ।
अन्तर्राष्ट्रिय खेलकुद दिवसको अवसरमा मदन भण्डारी स्पोर्ट्स एकेडेमीले आयोजना गरेको हाफ म्याराथन प्रतियोगितामा महिला र पुरुष गरी देशभरका २ हजार ५ सय ५० जना सहभागी छन् ।
पूर्वप्रधानमन्त्री तथा नेकपा एमाले अध्यक्ष केपी शर्मा ओलीले लुम्बिनीस्थित शान्ति दीपमा बालेको दीप ओलम्पिक कोच चन्द्रबहादुर घले, बिमला राना र मोहन घलेलाई दिएर प्रतियोगिताको उद्घाटन गर्नुभयो ।
मायादेवी मन्दिर अगाडिबाट शुरु भएको म्याराथन पर्साचोक, महिलबार हुँदै लुम्बिनी वरपर २१ किलोमिटरको दुरी पार गर्ने अध्यक्ष ध्रुव आचार्यले बताउनुभयो ।
प्रतियोगितामा पुरुषतर्फ पहिलो हुनेलाई १ लाख ५० हजार, दोस्रोलाई ७५ हजार र तेस्रोलाई ५० हजार रुपैयाँ नगद पुरस्कार प्रदान गरिने छ । महिलातर्फ पहिलो हुनेलाई १ लाख ५१ हजार, दोस्रोलाई ७५ हजार र तेस्रो हुनेलाई ५० हजार रुपैयाँ प्रदान गरिने अध्यक्ष आचार्यले बताउनु भयो ।
दुवै विधामा दशौं स्थानसम्मका लागि नगद पुरस्कार राशीसँगै प्रमाणपत्र तथा मेडल प्रदान गरिने छ ।
