संसार पोष्ट
बुटवल, १७ साउन । रुपन्देहीको देवदह नगरपालिका वडा नं. ४ भवानीपुरका बसन्त पौडेल (बलु) हत्यामा संलग्न रहेको आरोपमा प्रहरीले ओमप्रकाश चौधरी भन्ने चौधरी डगोरिया थारुलाई पक्राउ गरेको छ । बुटवल उपमहानगरपालिका वडा नं. १७ मनहरापुरका ५१ वर्षीय डगोरियालाई बिहिबार पक्राउ गरिएको जिल्ला प्रहरी कार्यालय रुपन्देहीका प्रवक्ता प्रहरी नायव उपरिक्षक धर्मराज भण्डारीले जानकारी दिनुभयो ।
डगोरिया गुण्डा नाईके मनोज पुनको साथी भएको प्रहरीले जनाएको छ । प्रहरीका अनुसार डगोरिया विरुद्ध व्यक्तिहरुलाई लुटपाट गर्ने तथा व्यक्तिलाई बन्धक बनाई रकम असुली गर्ने गरेको जाहेरी समेत प्रहरीमा परेको प्रहरीले जनाएको छ । डगोरियालाई रुपन्देहीको सिद्धार्थनगर नगरपालिका वडा नं. १ बाट पक्राउ गरिएको र डाँका मुद्दामा मुद्दा दर्ता गरि अदालतबाट म्याद थप लिई आवश्यक अनुसन्धानको काम अंगाडी बढाईएको प्रहरीले जनाएको छ ।
