बुटवल । रुपन्देहीको बुमटवल उपमहानगरपालिकामा रहेको एकता वचत तथा ऋण सहकारी संस्थाले संस्थाका शेयर सदस्यहरुलाई सहकारी शिक्षा तालिम प्रदान गरेको छ । सहकारी संस्थाले मंगलबार बुटवलमा कार्यक्रमको आयोजना गरी संस्थाका नयाँ तथा पुराना शेयर सदस्यहरुलाई सहकारी शिक्षा तालिम प्रदान गरेको हो ।
तालिममा प्रशिक्षण दिदै लुम्बिनी प्रदेश आन्तरिक मामिला तथा सहकारी मन्त्रालय सहकारी दर्ता अधिकारीको कार्यालयका रजिष्टार भिमप्रसाद तिवारीले कतिपय सहकारीका सञ्चालकहरुको गलत बुझाईकाकारण यसको वास्तविक रुप नै विग्रिन थालेको बताउनु भयो ।
उहाँले सहकारीमा अनुशासन र पारदर्शीता अपरिहार्य रहेको बताउँदै विधि र पद्धतिमा रहेर काम गरेका सहकारीमा भने अहिलेसम्म कुनै प्रकारको समस्या नदेखिएको बताउनु भयो । पछिल्ला केही दिनहरुमा सहकारी संस्थाहरुले गरेका अनियमितता सम्बन्धि उजुरी दिनदिनै आउन थालेको बताउँदै त्यस्ता समस्या आउन नदिनेगरी गतिविधि सञ्चालन गर्न सहकारी संस्था र सहकारीका सञ्चालकहरु वढि जिम्मेवार हुनुपर्नेमा उहांले जोड दिनुभयो ।
सहकारी संस्थाकी अध्यक्ष सावित्रा टण्डनले सहकारीका शेयर सदस्यहरुलाई सहकारी सम्बन्धि तालिम प्रदान गरेर सहकारीलाई पारदर्शी बनाउन र शेयर सदस्यहरुमा जागरुकता ल्याउनका लागि समय समयमा तालिम कार्यक्रम सञ्चालन गर्दै आएको बताउनु भयो ।
संस्थाका उपाध्यक्ष लोकहरी पाण्डेको स्वागत तथा शिक्षा समितिकि संयोजक तारा गौतमको सञ्चालनमा भएको कार्यक्रममा संस्थाका व्यवस्थापक नारायण सुवेदीले सहकारीका समग्र गतिविधिहरुको बारेमा जानकारी गराउनु भएको सचिव विष्णुप्रसाद पौडेलले बताउनु भयो ।
२०५४ सालमा स्थापना भएको उक्त सहकारीमा हाल २ हजार ६४ शेयर सदस्य छन् भने तालिम कार्यक्रममा करिव ३ सय जना सहभागि रहेका सचिव पौडेलले बताउनु भयो ।
