बुटवल, ६ कात्तिक । नेपाल पत्रकार महासंघ रुपन्देहीले जिल्लामा क्रियाशिल ९ जना पत्रकारलाई विभिन्न विधाका पुरस्कारबाट पुरस्कृत गरेको छ ।
साधरणसभाको अवसरमा आईतबार बुटवल उपमहानगरपालिकासँग सहकार्य गरि स्थापना गरिएको उत्कृष्ट पत्रकारिता पुरस्कार २०७५ बाट यानेन्द्र जिसी, २०७६ बाट रामप्रसाद आचार्य र २०७७ बाट रेखा भुसाल पुरस्कृत भएका छन् ।
पत्रकार जिसी दैनिक लुम्बिनीका सल्लाहकार सम्पादक, आचार्य नेपाल प्रेस र दैनिक पत्रमा आबद्ध छन् भने भुसाल नागरिक दैनिक लुम्बिनी प्रदेश संयोजक हुन् । पुरस्कृत पत्रकारहरुलाई नेपाल पत्रकार महासंघका केन्द्रीय अध्यक्ष विपुल पोखरेल र बुटवल उपमहानगरपालिकाका प्रमुख खेलराज पाण्डेयले संयुक्त रुपमा नगद ५० हजार राशी सहित प्रमाणपत्रले पुरस्कृत गर्नुभएको हो ।
यस्तै सिद्धार्थ नगरपालिकाकासँगको सहकार्यमा स्थापना गरिएको सिद्धार्थ श्रमजीवि पत्रकारिता पुरस्कार २०७६ बाट नरेश केसी, २०७७ बाट प्रकाश न्यौपाने र २०७८ बाट प्रतिक पौडेल पुरस्कृत भएका छन् । यो पुरस्कार महासंघका केन्द्रीय अध्यक्ष पोखरेल र सिद्धार्थ नगरपालिकाका प्रमुख इस्तियाक अहमदले प्रदान गर्नुभएको हो ।
यसैगरि रुपन्देहीको तिलोत्तमा स्थित बुटवल पब्लिक स्कूलद्वारा स्थापित उत्कृष्ट शिक्षा पत्रकारिता पुरस्कार २०७५ बाट पत्रकार कपिल ज्ञवाली, २०७६ बाट पुजा पन्थी र २०७७ बाट चन्द्रकान्त खनाल पुरस्कृत भएका छन् । यो पुरस्कार महासंघका केन्द्रीय अध्यक्ष पोखरेल र पुरस्कारका संस्थापक बुटवल पब्लिक स्कूलका संस्थापक हेमलाल शर्मा भुसालले प्रदान गर्नुभएको हो ।
