बुटवल, ४ कात्तिक । एकीकृत समाजवादीका अध्यक्ष माधव कुमार नेपालले एमाले अध्यक्ष केपी ओली नसुध्रिने बताउनुभएको छ ।
पाँच दलीय गठवन्धनले आज बुटवलमा आयोजना गरेको लुम्बिनी प्रदेश स्तरीय प्रशिक्षणमा बोल्दै–नेता नेपालले भन्नुभयो–‘सरम लाग्दैन, काम गर्न दिएनन् भनेर रूदै हिँडेर हुन्छ । बरु कमरेड घनश्याम भुसालले बोल्नुभएको भए कस्तो सुनिन्थ्यो, केपी ओली सुध्रनेवाला छैनन् ।’ उहांले भन्नुभयो ।
‘स्थानीय चुनावमा प्रतिगामीलाई जसरी पराजित ग¥यौं त्यसलाई पूर्ण बनाउन आगामी मंसिर ४ गतेको निर्वाचनमा पनि उनीहरूलाई पराजित गर्नुको विकल्प छैन, नेता नेपालले भन्नुभयो । ओलीले सरकारको नेतृत्व गर्दा आफुले र माओवादी अध्यक्ष प्रचण्डले भनेको मान्दै नमानेपछि छुट्टिनु परेको नेता नेपालले बताउनु भयो ।
नेता घनश्याम भुसालतर्फ हेर्दै नेता नेपालले भन्नुभयो –‘उहाँले ओलीलाई धुन्छु भन्नु भएको थियो, साबुन पानीले धुँदाधुदै पाखा लाग्नु पर्यो । मैले पहिले नै भनेको थिए ओली सुध्रिने वाला छैनन् ।’ आफूहरुले गठबन्धन गरेर मुलुकलाई निकै ठूलो संकटबाट बचाएको उल्लेख गर्नुभयो । प्रतिगामीलाई ठेगान लगाएको भन्दै उहांले यो अभियान नचालेको भए सबै उपलब्धि गुम्ने दाबी गर्नुभयो । ओली हिटलर बन्न खोजेको उहांको आरोप थियो ।
संबोधनमा अधिकांश समय ओलीलाई कटाक्ष र आलोचनामा समय खर्चिनुभएका नेता नेपालले अन्तिममा ‘जय नेपाल’ सम्बोधन गर्दै भाषणको अन्त्य गर्नुभएको थियो ।
