बुटवल, ४ कात्तिक । नेपाली कांग्रेसका वरिष्ठ नेता रामचन्द्र पौडेलले अहिलेको गठबन्धन देश जोगाउने अभियान भएको बताउनुभएको छ ।
यो गठवन्धन चुनावी तालमेल मात्र होइन नेता पौडेलले भन्नुभयो –‘यो गठवन्धन देश र ब्यवस्था जोगाउने अभियान हो ।’
पाँच दलीय गठबन्धनले आज बुटवलमा आयोजना गरेको लुम्बिनी प्रदेश स्तरीय प्रशिक्षणमा बोल्दै नेता पौडेलले पाँच दलको गठबन्धनले देश जोगाउँछ, सुशासन ल्याउँछ, स्थायित्व ल्याउँछ, यसको विकल्प छैन, भन्नुभयो ।
अहिलेको चुनाव अग्रगामी शक्ति र प्रतिगमनकारी शक्ति बीचको लडाई भएकाले संविधान माथि धावा बोल्नेलाई पराजित गर्न पाँच दलीय गठबन्धन भएको नेता पौडेलले बताउनु भयो ।
गठबन्धनको उम्मेदवार विरूद्व लाग्ने छुट कसैलाई छैन यो सहमति अक्षरशः पालना गरेर जानु पर्दछ, सत्ता होइन व्यवस्था बचाउन अहिले पाँच दलको गठबन्धन हो यही सन्देश लिएर आफ्नो क्षेत्रमा जानुहोस्, नेता पौडेलले कार्यकर्तालाई निर्देशन दिनुभयो । गठबन्धन भएकाले सबैले स्थान नपाएकोमा नठुस्किन पनि उहांले सबैलाई आग्रह गर्नुभयो ।
