देशलाई स्थायित्व दिन तीनै तहमा गठबन्धनको सरकार : बालकृष्ण खाँण

बुटवल, ४ कात्तिक । नेपाली कांग्रेसका केन्द्रीय सदस्य बालकृष्ण खाँणले तीनै तहमा गठबन्धनका सरकार बनाएर देशलाई स्थायित्व दिनुपर्ने र नेपालीको यसमै भरोसा गरेको बताउनुभएको छ ।
गठबन्धनका कारण धेरै नेताहरूले त्याग गर्नुपरेको उल्लेख गर्दै गृहमन्त्री समेत रहेका केन्द्रीय सदस्य खाँणले संघमा तयारी गरेकाले प्रदेशमा र प्रदेशमा तयारी गरेकाले उम्मेदवारी त्याग गर्नुपरेको बताउनु भयो ।
आगामी मंसिर ४ गतेको निर्वाचनलाई लक्षित गर्दै सत्ता गठबन्धनले आज रुपन्देहीको तिलोत्तमा नगरपालिका योगिकुटी स्थित होटल पौवामा आयोजना गरेको लुम्विनी प्रदेश स्तरीय संयुक्त प्रशिक्षण कार्यक्रमलाई सम्बोधन गर्दै गृहमन्त्री खाँणले गठबन्धनको सहमति कार्यान्वयन गर्नका लागि सबै दलबाट यस्तो गर्नुपरेको बताउनुभयो ।
संविधानको रक्षा गर्न र गठबन्धन कार्यान्वयन गर्न सबैले सहमति पालना गर्नुपर्नेमा मन्त्री खाँणले जोड दिनुभयो । नेपालका सबै उपलब्धि सहमति र सहकार्यमा पूरा भएको स्मरण गर्दै सबै क्षेत्रमा गठवन्धनका उम्मेदवारलाई विजयी गराउन सबै नेता कार्यकर्तालाई उहांको निर्देशन थियो ।