बुटवल, ४ कात्तिक । सत्ता गठबन्धनले आज बुटवलमा लुम्बिनी प्रदेशस्तरीय प्रशिक्षण गर्दैछ । आगामी मंसिर ४ गतेको निर्वाचनलाई लक्षित गर्दै गठवन्धनले प्रशिक्षणको आयोजना गरेको हो ।
दिउँसो २ बजेदेखि तिलोत्तमाको योगिकुटी स्थित होटल पौवामा हुने प्रशिक्षणलाई प्रधानमन्त्री एवं नेपाली कांग्रेसका सभापति शेरबहादुर देउवा, माओवादी केन्द्रका अध्यक्ष पुष्पकमल दाहाल प्रचण्ड, नेकपा एकीकृत समाजवादीका अध्यक्ष माधवकुमार नेपाल, राष्ट्रिय जनमोर्चाका अध्यक्ष चित्रबहादुर केसी लगायतका नेताले सम्बोधन गर्ने कांग्रेस लुम्विनी प्रदेश सभापति अमरसिंह पुनले जानकारी दिनुभयो ।
गठबन्धनको केन्द्रीय संयन्त्रले तोके बमोजिम हुन लागेको निर्वाचन केन्द्रित प्रशिक्षणमा गठबन्धनमा आवद्ध दलका प्रदेशमा रहेका केन्द्रीय, प्रदेश र जिल्ला कमिटिका पदाधिकारी तथा यस क्षेत्रका उम्मेदवारहरुको सहभागिता रहने सभापति पुनले जानकारी गराउनु भयो ।
यसअघि सत्ता गठबन्धनले काठमाडौं र ललितपुरमा पनि यस्तै प्रशिक्षण कार्यक्रम आयोजना गरेका थिए ।
