बुटवल, २ कात्तिक । बुटवल–८ स्थित कल्याणकारी बहुउद्देश्यीय सहकारी संस्था लिमिटेडले संस्था स्थापनाको अवसर पारेर सामाजिक उत्तरदायित्वका कार्यक्रम गरेको छ ।
संस्था स्थापनाको अवसर पारेर सहकारीले बुधवार बुटवल ७ मा रहेको नीलकण्ठ बावा धाममा रहेका ७२ जना बटुकलाई खाद्यान्न सहयोग गरेको छ ।
सहकारीका अध्यक्ष लक्ष्मण आचार्य क्षेत्रीको नेतृत्वमा गएको सहकारीका पदाधिकारी सहितको टोलीले नीलकण्ठ बावा धामकी संरक्षक देवमाया भटृराई र धामका उपाध्यक्ष चुरामणि पौडेललाई खाद्यान्न सामाग्री हस्तान्तरण गरेको सहकारीका सचिव कृष्णप्रसाद ज्ञवालीले बताउनु भयो । धाममा रहेका बटुकहरुका लागि १७ हजार मुल्य बराबरको खाद्यान्न सामाग्री प्रदान गरिएको अध्यक्ष क्षेत्रीले बताउनु भयो ।
त्यस्तै सहकारीले विहिवार सहकारीको कार्यालय परिसरमा खुला रक्तदान कार्यक्रम आयोजना गरेको छ । रक्तदान गर्न ईच्छुक शेयर सदस्य तथा आम नागरिकहरुमा सहभागिताका लागि सहकारीले आह्वान गरेको छ । बिहान साढे सात वजेदेखि रक्तदान कार्यक्रम शुरु हुने संस्थाले जानकारी गराएको छ ।
त्यस्तै सहकारीले मुलुकमा शान्ति सुरक्षा अमनचयनमा अझै सफलता मिलोस र आगामी मंसिर ४ गते हुने प्रतिनिधिसभा र प्रदेशसभाको निर्वाचनमा कुनै अप्रिय घटना विना शान्तिपूर्वक सम्पन्न होस भन्दै शुक्रवार दीपावली गर्ने कार्यक्रम तय गरेको छ ।
