बुटवल, १० असोज । बुटवल ३ गोलपार्कस्थित तिनाउ नदी (तिलोत्तमा) किनारमा पहिलोपटक सन्ध्याकालिन आरती गरिएको छ । दुर्गा मन्दिरको पश्चिममा रहेको संरचनामा सन्ध्याकालिन आरती गरिएको हो ।
आरती पूजाको शुभारम्भ गर्दै कार्यक्रमका प्रमुख अतिथि एमाले उपाध्यक्ष तथा पूर्व अर्थमन्त्री बिष्णु पौडेलले बुटवलमा यसप्रकारको आरती गर्नका लागि संरचना बनाउने प्रतिबद्धता जनाउनुभयो ।
४३ औँ विश्व पर्यटन दिवसको पूर्व सन्ध्यामा यो कार्यक्रम गरिएको आयोजक संस्था नेपाल एशोसिएसन अफ टुर एण्ड ट्राभल एनेन्ट नाट्टा लुम्बिनी प्रदेश अध्यक्ष रचना पन्तले बताउनुभयो ।
शंखध्वनीका साथ आरती र स्तोत्र पाठसहित धुप बालेर ३ जना पण्डितले बिधिपूर्वक ४५ मिनेटसम्म आरती पूजा गरेका थिए । बुटवलका जितगढी, फूलबारी, हिलपार्क आउने पर्यटकलाई लक्षित गरि आरती गरिएको हो । आरतीलाइ दैनिक गर्नेगरि निरन्तरता दिनका लागि आफूहरुले सक्दो सहयोग गर्ने बुटवल ३ का वडाध्यक्ष बिष्णु ढकालले बताउनुभयो ।
कोरोनाले थला परेको पर्यटन उद्योगलाई कसरी चलायमान बनाउन र सिमावर्ती भारतीय पर्यटकहरुलाई यहाको धार्मिक, साँस्कृतिक ऐतिहासिक शहरको रुपमा स्थापित गर्न सन्ध्याकालिन आरतीले महत्वपूर्ण भूमिका खेल्ने कार्यक्रम संयोजक गणेश भट्टराईले बताउनुभयो ।
बुटवलमा धार्मिक तथा साँस्कृतिक पर्यटनमा आरतीले नयाँ आयाम थपिने र छिमेकी देश भारतबाट पनि पर्यटक तान्न यसले विशेष भूमिका खेल्ने अनुमान गरिएको छ । आरतीका लागि अहिलेकै स्थान उपयुक्त हुने युवा ज्योतिष जनार्दन न्यौपानेको भनाइ छ ।
