पहाडबाट शहर वजारमा हुने बसाई सराई रोक्न शिक्षा, स्वास्थ्य, सडकको विकासमा ध्यान दिन जरुरी

बुटवल, ८ असोज । पहाडवाट शहर वजारमा बसाई सराई गर्ने परिपाटीको अन्त्यकालागि पहाडी जिल्लाका स्थानीयतहले शिक्षा, स्वास्थ्य, सडक लगायत विकासका काममा विशेष ध्यान दिनुपर्ने एक कार्यक्रमका वक्ताहरुले बताएका छन् ।
गुल्मी जिल्लाको ईस्मावाट रुपन्देहीका विभिन्न ठाउंमा बसोवास गर्नेहरुले स्थापना गरेको संस्था ईस्माली समाज रुपन्देहीले विजया दशमी, शुभ दीपावली तथा न्वागी पर्वको अवसरमा आयोजना गरेको शुभकामना, स्वागत तथा सम्मान कार्यक्रममा वोल्ने वक्ताहरुले यस्तो सुझाव दिएका हुन् ।
शहर वजारमा पाईने सुख, सुबिधा, आराम, खानपान, औषधी उपचार र शिक्षाका लागि मानिस वसाई सराई गर्ने गरेको भन्दै यस्ता सुविधा गाउँमै उपलब्ध गराउन स्थानीय तहका जनप्रतिनिधिहरु केन्द्रि हुने हो भने वसाई सराईको दरलाई कम गर्न सकिने उनीहरुले बताए ।
कार्यक्रममा ईस्मा गाउँपालिकाका अध्यक्ष भगवत सिंह खड्काले ईस्माली जनतालाई विकासको अनुभूति हुने गरि कामगर्ने प्रतिवद्धता व्यक्त गरे । जिल्लामा सवैभन्दा कम वजेट भएको स्थानिय तहमा ईस्मा परेता पनि सबै जनतालाई एउटै परिवार मानी कामगर्ने उनले बताए । ईश्माले भोगेको प्राकृतिक विपतमा ईस्माली समाज रुपन्देहीले गरेको सहयोगको प्रशंसा गर्दै उनले ईस्माको जुकेपानी र नुवालामा गएको पहिरो तथा कोभिड १९ को त्रासमा रहेका जनतालाई समाजले सहयोग जुटाएर पठाएको उहाँले स्मरण गरे । ईस्मालाई शिक्षा, स्वास्थ्य, सडक पूर्वाधार लगायतका विकासको गतिमा अघि बढाउन आफूले दिनरात नभनी कर्म गरेको चर्चा गर्दै गाउँपालिका अध्यक्ष खड्काले कृषि र पर्यटनको क्षेत्रमा पनि नविन सोंचका साथ काम थालिएको उल्लेख गरे । ब्यवसायिक कृषि गर्न चाहने युवालाई विशेष प्याकेजको ब्यवस्था गरिएको, मासुमा गाउँपालिका आत्मनिर्भर रहेको र दुधमा आत्मनिर्भर हुन नसकेकाले कम्तीमा पाँच वटा गाई भैसी पाल्ने किसानलाई विषेश सुविधा दिने कार्ययोजना पालिकाले निर्माण गरेको उनले बताए ।
ईस्माबाट रुपन्देही झरेर उद्योग ब्यवसाय गरेका उद्योगीव्यवसायीलाई आफ्नो जन्मभूमिको माटो बाँझो नराख्न आग्रह गर्दै अध्यक्ष खड्काले बाँझो रहेको जग्गामा माटो परीक्षण गरेर उपयुक्त फलफूल तथा बाली लगाउन आग्रह गरे ।
ईस्माली समाज रुपन्देहीका अध्यक्ष वाबुराम गौतमको सभापतित्वमा भएको कार्यक्रममा समाजका द्धितीय उपाध्यक्ष तिलक महत, समाजका शेर बहादुर केसी, भिमलाल घिमिरे, धर्म प्रसाद गौतम, पुनाराम पोखरेल, श्याम खरेल, लक्ष्मी अर्याल, मित्र गौतम, समाजका सचिव लोक प्रसाद खरेल लगायतले ईस्माको विकासमा समाजले रुपन्देहीवाट पनि पहलगर्ने धारणा राखेका थिए ।