स्वामिनारायण मुक्तिनाथ धाममा पुजा अर्चना, शिवज्योतिर्लिंङ्गमा जलार्पण
बुटवल, २७ वैशाख । गृहमन्त्री वालकृष्ण खाँणले रुपन्देहीको बुटवल उपमहानगरपालिका वडा नं १२ नयाँगाउँ स्थित श्री स्वामिनारायण मुक्तिनाथ धाममा पुजा अर्चना गर्नुभएको छ ।
मन्त्री खाँणले आज बिहानै धाममा पुगेर शिवज्योतिर्लिंङ्गमा जलार्पण सहित पुजा आराधना गर्नुभएको हो । त्यस अवसरमा गृहमन्त्री खाँणलाई मन्दिर व्यवस्थापन समितिका अध्यक्ष धर्मराज शर्मा, कांग्रेसबाट वडा अध्यक्षका उम्मेदवार डिल्ली प्रसाद शर्मा आचार्यसहितका उम्मेदवार, धामका पदाधिकारी तथा सदस्यहरुले स्वागत गरेका थिए ।
सो अवसरमा बोल्दै मन्त्री खाँणले देश विकासका लागि सबै जातजाति, धर्म, संस्कृति भन्दा माथि उठेर लाग्नुपर्नेमा जोड दिनुभयो । उहाँले सबै जात, जाति, धर्म, संस्कृतिको आफ्नै विशेषखाले परम्परा रहेको उल्लेख गर्दै सबै धर्मावलम्बीले एक–अर्काको सम्मान गर्नुपर्ने बताउनुभयो ।
त्यस अवसरमा बुटवल उपमहानगरपालिकाका मेयर पदका उम्मेदवार खेलराज पाण्डेयले पनि मन्दिरमा पुजा अर्चना गर्नुभएको थियो । मन्दिरमा गृहमन्त्री खाँणसंगै मेयर उम्मेदवार पाण्डेयले पनि पुजा आराधना गर्नुभएको हो । उहाँले नगरमा कांग्रेस नेतृत्वको गठबन्धन जित नजिक रहेको दाबि गर्नुभयो ।
धाममा पुगेका नेताहरुलाई फूलमालासहित स्थानीयले न्यानो स्वागत गरेको महाधिबेशन प्रतिनिधि गोपाल पाण्डेले बताउनुभयो ।
