बुटवल, २६ वैशाख । रूपन्देहीको तिलोत्तमा नगरपालिका वडा नम्वर ४ मा नेपाली कांग्रेसका तर्फबाट वडाअध्यक्ष पदमा युवा गोविन्द प्रसाद भुसाल उम्मेदवार बनेका छन् । वडालाइ बिकासमा नमुना बनाउने प्रतिवद्धता सहित उनी यतिबेला जनताको घर दैलोमा पुगेका छन् ।
यही बैशाख ३० गते हुने स्थानीय तह निर्वाचन २०७९ का लागि उनले वडाको समग्र विकास सहितको प्रतिबद्धता पत्र सार्वजनिक गरेर मतदाता भेटघाटमा ब्यस्त छन् ।
प्रतिवद्धता पत्रमा वडामा रहेको जनज्योति मावि को स्तरोन्नति गरी अंग्रेजी तथा नेपाली दुबै माध्यममा पढाइ हुने व्यवस्था गर्ने, प्राविधिक तथा सीपमूलक शिक्षाको पठनपाठनको सुरुवात गर्ने, निर्माणाधीन अवस्थामा सीमानगरमा रहेको शान्ति चिल्ड्रेन पार्कको स्तरोन्नति गरिने, निर्माणाधीन अवस्थामा रहेको किरियापुत्री भवनलाई छिटोभन्दा छिटो पूरा गरिने, वडाभित्रका सरकारी भवनहरूलाई अपाङ्गता मैत्री बनाइनेलगायतका विषयहरु समेटिएका छन् । सरकारी सार्वजनिक जग्गाको संरक्षण, जनताले रोजेका र छानेका विकासका योजनालाई प्राथमिक्ता, वडावाट प्रदान गरिने प्रशासनिक सेवा सहज, सरल र पारदर्शी वनाइने, वडामा सवैले अपनत्व गर्ने खालको वातावरण निर्माण गरिने, महिला, दलित, पिछडिएका वर्गलाई सिपमुलक तालिम तथा रोजगारीको अवसर प्रदान गरिने लगायतका प्रतिवद्धता मतदाता समक्ष गरिएको उम्मेदवार भुसालले बताए ।
प्रतिवद्धता पत्रमा वडा अन्तर्गत पर्ने १० नम्बर तपाहा चोकदेखि उत्तरतर्फ वडा नम्बर ३ को सीमानासम्मको सडकको दाँयावाँया नाला बनाई आवश्यक स्तरोन्नति गरिने लगायतका विषय समेटिएको वडा अध्यक्षका उम्मेदवार भुसालले बताए । वडामा महिला सदस्यमा धनमाया राना, दलित महिला सदस्यमा मिनाकुमारी रसाली, खुला सदस्यमा मित्रलाल न्यौपाने र मातृका ज्ञवाली उम्मेदवार रहेका छन् । उनीहरुले वडालाई भ्रष्टाचार मुक्त वडा र विकासमा नमुना वार्ड वनाउने प्रतिवद्धता ब्यक्त गरेका छन् ।
नेपाली कांग्रेसले वडाको विकासका लागि उद्योग ब्यवसाय र सामाजिक अभियानमा निरन्तर खटिरहने युवाहरुलाई उम्मेदवार वनाएको भन्दै वडावासी पनि खुशी भएकाछन् । मतदाताको घरदैलोमा पुग्दै गर्दा सबै मतदाताले यो पटक कांग्रेसका सबै उम्मेदवारलाई विजयी वनाउने प्रतिवद्धता सहित विजयको शुभकामना ब्यक्त गरेकाले आफुहरुको विजय सुनिश्चित भएको सदस्य पदका उम्मेदवार मित्रलाल न्यौपानेले बताए ।
