मोतिपुर औद्योगिक क्षेत्रका कारण कोही पनि विस्थापित हुनु पर्दैन : गृहमन्त्री खाँण

बुटवल, २६ वैशाख । गृहमन्त्री बालकृष्ण खाँणले मोतिपुर औद्योगिक क्षेत्रका कारण कोही पनि विस्थापित हुनु नपर्ने बताउनुभएको छ । मोतिपुर औद्योगिक क्षेत्र निर्माण गर्न सरकार प्रतिवद्ध रहेको बताउंदै उहांले निर्माणका क्रममा त्यस क्षेत्रका स्थानीयहरुलाई विस्थापित नगरिने बताउनुभयो ।
बुटवल १७ मा रहेको मुक्तेश्वर मन्दिरमा आज वैदिक परम्पराअनुसार पूजाअर्चना गरेपछि आयोजित कार्यक्रममा बोल्दै गृहमन्त्री खाँणले स्थानीयलाई आश्वस्त पार्नुभएको हो ।

गृहमन्त्रीसहित कांग्रेसका तर्फबाट लुम्बिनी प्रदेश सभा सदस्य पुष्पा चौधरी,महासमिति सदस्य बिमल ढकाल, प्रदेस प्रतिनिधि भिमप्रसाद न्यौपाने, वडा नम्बर १७ का पार्टी सभापति बाबुराम घिमिरे, सचिव कमल गुरुङ, वडा नम्बर १७ का अध्यक्ष पदका उम्मेदवार ज्ञान बहादुर रेस्मी, वडा नम्बर १८ का अध्यक्ष पदका उम्मेदवार गोले प्रसाद चौधरी, १९ का अध्यक्ष पदका उम्मेदवार मिनप्रसाद श्रेष्ठ लगायतले वैदिक परम्पराअनुसार पूजा गर्दै विश्वशान्ति, देश तथा नगरवासीको सुख र समृद्धिको कामना गर्नुभएको थियो ।
खाँणले देश विकासका लागि सबै जातजाति, धर्म, संस्कृतिभन्दा माथि उठेर लाग्नुपर्नेमा जोड दिनुभयो । उहांले सबै जात, जाति, धर्म, संस्कृतिको आफ्नै विशेषखाले परम्परा रहेको उल्लेख गर्दै सबै धर्मावलम्बीले एक–अर्काको सम्मान गर्नुपर्नेमा जोड दिनुभयो ।
धर्म, जातजाति, क्षेत्रीयता, लिंग र भाषाका आधारमा कसैले राजनीति वा समाजलाई विभाजन गर्न खोज्छ भने त्यसले केही व्यक्तिलाई फाइदा पुराए पनि आमनागरिकलाई बेफाइदा पुराउने उहांले बताउनु भयो ।
गृहमन्त्री बालकृष्ण खाँणले ३० वैशाखमा हुने स्थानीय तह निर्वाचनमा भाग लिन अहिलेसम्म निर्वाचनमा भाग नलिएका राजनीतिक दल र सम्पूर्ण आम नागरिकलाई आग्रह गर्दै सरकार स्थानीय तह निर्वाचन शान्ति पूर्णरूपमा स्वच्छ, निष्पक्ष र धाँधलीरहित तरिकाले सम्पन्न गर्न प्रतिबद्ध रहेको बताउनुभयो ।
सीमित स्रोतसाधनको उपयोग गरेर निर्वाचनको सुरक्षा प्रबन्धबारे सुरक्षा निकाय र स्थानीय प्रशासनले गरेको तयारी प्रशंसायोग्य रहेको भन्दै गृहमन्त्री खाँणले आगामी दिनमा पनि यो भन्दा राम्रो व्यवस्थापन स्थानीय प्रशासन र सुरक्षा निकायले निर्वाचनका सन्दर्भमा गर्नेमा आफू आशावादी रहेको बताउनु भयो ।