राज्यले नगरेको काम समाजले गरेका भन्दै प्रशंसा
चैत, २६ चैत्र । गुल्मेली सम्पर्क समाज रुपन्देहीले समाजको नियमित कार्यक्रम अन्तर्गत शनिबार गुल्मीको सांस्कृतिक पहिचान सराय नाच सहित तिलोत्तमा नगरपालिका अन्तर्गत शँकरनगर वनवाटिकामा वनभोज र विविध साँस्कृतिक कार्यक्रम गरेको छ । चैते दशैंको अवसरमा आयोजना गरिएको वनभोज कार्यक्रममा पञ्चेबाजा सहितको सराय नाच प्रदर्शन, २०७९ को क्यालेन्डर विमोचन र नयाँ वर्षको शुभकामना आदानप्रदान गरिएको थियो ।
समाजका अध्यक्ष डा.नारायणप्रसाद पन्थको अध्यक्षतामा भएको कार्यक्रममा प्रदेश सभासद लिला गिरीले बुझौँ हाम्रो रीति र थिति, जोगाआँै हाम्रो गौरवमय संस्कृतिको नारा लिएर स्थापना भएको गुल्मेली सम्पर्क समाजले स्थापनाको १७ औं वसन्त पार गर्दा निकै परिपक्व संस्थाका रूपमा स्थापित भएकोमा खुसी व्यक्त गर्नुभयो । उहांले आगामी दिनमा समाजले गर्ने कार्य सफल र उदाहरणीय बनून् भन्ने शुभकामना व्यक्त गर्दै समाजले आयोजना गरेको सराय नाचमा सहभागी भएर गुल्मेली सम्पर्क समाजले संस्कृतिको संरक्षणमा समेत उल्लेख्य कार्य गरेको प्रतिक्रिया दिनुभयो । उहांले राज्यले नगरेको काम समाजले गरेको भन्दै समाजको प्रशंसा गर्नुभयो ।
यस्तै तिलोत्तमा नगरपालिका प्रमुख वासुदेव घिमिरेले गुल्मेली सम्पर्क समाजको गुरुयोजना अनुसार निर्माण भएको तिलोत्तमा नगरको महत्वपूर्ण पर्यटकीय स्थान श्रृङ्गेश्वरधाम, उद्घाटनको तयारीमा रहेको ज्येष्ठ नागरिक मिलनकेन्द्र तथा गुल्मेली सम्पर्क समाजको अगुवाइमा स्थापना भएको रेसुङ्गा अलौकिक बचत तथा ऋण सहकारी संस्था तिलोत्तमा नगरपालिकाको गहना भएको बताउँदै समाजले सामाजिक तथा आर्थिक क्षेत्रमा गरेको प्रगतिको प्रशंसा गर्नुभयो ।
गुल्मीबाट रुपन्देहीमा आई स्थायी र अस्थायी रूपमा बसोबास गरिरहेका गुल्मेली दाजुभाइ तथा दिदीबहिनीहरूबीच आपसी सम्बन्ध प्रगाढ बनाउँदै एक अर्काबीच परिचय आदानप्रदान गर्ने उद्देश्यले वनभोज कार्यक्रम आयोजना गरिएको समाजका प्रथम उपाध्यक्ष तथा वनभोज कार्यक्रम संंयोजक कृष्णप्रसाद भण्डारीले बताउनुभयो ।
सो कार्यक्रममा समाजका अध्यक्ष डा. नारायणप्रसाद पन्थले समाजको मुल मर्म र भावना अनुसार समाजले आफ्ना गतिविधिलाई अगाडी बढाएकाृ भन्दै कार्यक्रम सफल वनाउन सहयोग गर्ने सबै प्रति धन्यवाद सहित आभार व्यक्त गर्नुभयो ।
सो अवसरमा समाजका संस्थापक अध्यक्ष तथा संरक्षक ई. हिराबहादुर भलामी, श्रृङ्गेश्वर धामका अध्यक्ष ऋषि भण्डारी, ज्येष्ठ नागरिक मिलन केन्द्रका अध्यक्ष यदुनाथ पाण्डे, सल्लाहकार टिकाराम घिमिरे, खिमानन्द भट्टराई, समाजको सिद्धार्थनगर शाखा भैरहवाका अध्यक्ष केशव ज्ञवालीलगायतले शुभकामना मन्तव्य व्यक्त गर्नुभएको थियो ।
कार्यक्रममा सराय नाचको संयोजन समाजका संस्थापक सचिव एबं हालका सल्लाहकार यज्ञश्वर मरासिनी तथा समाजका सहकोषाध्यक्ष अर्जुन कुँवरले गर्नुभएको थियो । कार्यक्रममा होराइजन जी. बी. एस स्कुल तथा होराइजन कलेज ड्राइभरटोलका विद्यार्थीहरुले नृत्य तथा कवि सरु ज्ञवालीले समसामयिक विषयको कविता वाचन गर्नुभएको थियो । कार्यक्रमको सञ्चालन महासचिव कृष्णप्रसाद पोखरेल तथा सहजिकरण सचिव पुरुषोत्तम पाण्डेयले गर्नुभएको थियो ।
