संसार पोष्ट
बुटवल, १२ साउन । जिल्ला प्रहरी कार्यालय रुपन्देहीले गत आर्थिक बर्ष २०७५÷०७६ मा विभिन्न राजश्व अशुली गर्ने निकायमा ६ करोड बढि राजश्व दाखिला गरेको छ । रुपन्देही प्रहरीले भैरहवा भन्सार कार्यालय बेलहिया, राजश्व अनुसन्धान कार्यालय र पशु क्वारेन्टाइन चेक पोष्ट बेलहिया समेत गरि कुल ६ करोड ७९ लाख ७० हजार ७ सय ४९ रुपैंया बराबरको राजश्व दाखिला गरेको हो ।
प्रहरीले गत आर्थिक वर्षमा भन्सार छलि निकासी पैठारी गरी ल्याइएका ५ करोड २१ लाख ४४ हजार ७२ रुपैयाँ बराबरको सामान बरामद गरी भैरहवा भन्सार कार्यालयमा बुझाएको थियो ।
यस्तै रुपन्देही प्रहरीले सोही आर्थिक बर्षमा ६२ लाख १८ हजार ४ सय ६० रुपैयाँ मुल्य बराबरको चोरी तथा प्रतिबन्धित कार्यमा प्रयोग भएका ६७ वटा मोटरसाईकल, ४ वटा पिकअप गाडी, २ वटा ट्रक र १ वटा कार समेत बरामद गरी भन्सार कार्यालयमा बुझाएको छ ।
प्रहरीका अनुसार खुल्ला सिमानाको फाईदा उठाउदै भारतबाट कपडा, हार्डवेयरका सामान, मोटरपार्टस, चिनी, ईलेक्ट्रोनिक्सका सामानहरु, किरानाका सामानलगायतका सामनहरु भन्सार छली नेपाल भित्रने गरेका छन्् । यस्तै नेपालबाट तेस्रो मुलुकबाट आयातित दाल, मटर, मरिच, लगायतका समाग्रीहरु भन्सार छली भारत निकासी हुने गरेको छ ।
यस्तै रुपन्देही प्रहरीले गत आर्थिक वष्र्यामा भारतबाट भन्सार छलि नेपाल भित्राएको अन्दाजी ३८ लाख मुल्य बराबरको १३ सय ८८ कार्टुन डायपर र सेनेटरी प्याड भएको कन्टेनर, सुन २१ तोला ६२ लाल, चाँदी १ किलो ९४ ग्राम, स्रोत नखुलेको भारतिय रुपैयाँ ६४ लाख ८९ हजार ४ सय सहित अन्दाजी मुल्य १ करोड ५६ लाख ८ हजार १ सय ७७ रुपैंयाँ बराबरको सामाग्री सहित सो कार्यमा संलग्न ब्यक्तिहरुलाई पक्राउ गरेको थियो । यसरी बरामद भएका सामाग्री र संलग्न ब्यक्तिहरुलाई थप अनुसन्धान तथा कारवाहीको लागि राजश्व अनुसन्धान कार्यालयमा बुझाएको जिल्ला प्रहरी कार्यालय रुपन्देहीले जनाएको छ ।
सोही आर्थिक वयर्षमा नियम तथा मापण्ड बिपरित निकासी तथा पैठारी गर्दै गरेको अबस्थामा ब्रोईलर कुखुराको चल्ला २० हजार १ एक सय ५० गोटा, हाँसको १ दिने चल्ला ५ हजार गोटा, तयारी ब्रोईलर कुखुरा २ हजार १ एक सय ८५ गोटा, ब्रोईलर कुखुराको मासु २ सय २६ किलो बरामद गरी वारदातमा संलग्न ब्यक्तिहरुलाई रुपन्देही प्रहरीले पक्राउ गरी कारवाहीको लागि पशु क्वारेन्टाईन चेक पोष्ट बेलहियामा बुझाईएको छ । यसरी बरामद गरिएको मालवस्तु नष्ट गरिएको र सलंग्न व्यक्तिबाट जरिवाना वापत २ लाख १८ हजार ५ सय रुपैंया राज्य कोषमा दाखिला भएको प्रहरीले जनाएको छ ।
नेपाल प्रहरीको सक्रियतासंगै खुल्ला सिमानाको फाईदा उठाई हुने चोरी निकासी तथा पैठारीमा धेरै न्यूनिकरण भएको जिल्ला प्रहरी कार्यालय रुपन्देहीका प्रवक्ता समेत रहनुभएका प्रहरी नायव उपरिक्षक धर्मराज भण्डारीले बताउनु भयो ।
