जेसिभीको ठक्करबाट नवलपरासीमा एक महिलाको निधन

रामकुमार श्रेष्ठ
नवलपरासी, २१ माघ । पूर्वी नवलपरासीमा जेसिभीको ठक्करबाट एक जनाको निधन भएको छ । नवलपुर प्रहरीका अनुसार पूर्वी नवलपरासीको देवचुली १३ बोहुना खोलामा रहेको देवचुली ३ निवासी लिलप्रसाद पाठकको मनकामना क्रसर उद्योगमा नम्बर नभएको जेसिभीको ठक्करबाट सोही क्रसरमा काम गर्ने मजदुरको निधन भएको हो ।
क्रसर भित्रै क्यान्टिन सञ्चालन गर्दै आएकी देवचुली १२ निवासी अन्दाजी ४० बर्षीया निर्मला कुमारी महतलाई पार्किङ्ग गर्ने क्रममा जेसिभीले ठक्कर दिएको हो । दुर्घटनामा परी गम्भीर घाइते महतको देवचुली अस्पताल दलदलेमा उपचारका लागि लगिएकोमा उपचारको क्रममा हिजो साँझ ७ बजेतिर निधन भएको प्रहरीले जनाएको छ ।
ठक्कर दिने जेसिभी प्रहरी नियन्त्रणमा रहेको छ । ठक्कर दिने चालक देवचुली ४ निवासी १९ बर्षीय मनबहादुर नेपाली घटना पछि फरार रहेपनि पछि नियन्त्रणमा लिएको प्रहरीले जनाएको छ । चालकको सवारी चालक अनुमति पत्र समेत नरहेको स्रोतले जनाएको छ ।