भैरहवा, २० पुस । रोाहिणी गाउँपालिकाले वडा नम्बर ७ मा बस्ने जेष्ठ नागरिकलाई कम्बल वितरण गरेको छ । ७ नम्बर वडाका ३ सय बढीलाई न्यानो कम्बल बितरण गरिएको गाउँपालिकाले जनाएको छ ।
चिसो बढे संगै जेष्ठ नागरिकहरु बढी प्रभावित हुने भएकोले वडामा रहेका गाउँपालिकामा जेष्ठ नागरिकमा सुचिकृतहरुलाई कम्बल बितरण गरिएको रोहिणी गाउँपालिका अध्यक्ष सनोज कुमार यादवले जानकारी दिनुभयो । यादवले ७ नम्बर वडा कार्यालयले यस अघि नै बिनियोजन गरेको बजेटबाट उनीहरुलाई कम्बल बितरण गरेको बताउनु भयो । यस संगै वडामा रहेका एकल महिलाहरुलाई पनि भोली कम्बल बितरण गर्ने कार्यक्रम छ ।
रोहिणी गाउँपालिकाले चिसोबाट जोगिन छिट्टै दाउराको ब्यस्थापन समेत गर्ने उहांले बताउनु भयो ।
कम्बल बितरण कार्यक्रममा बोल्दै अध्यक्ष यादवले चिसोबाट जेष्ठ नागरिक र बालबालिका बढी प्रभावित हुने भएकोले अति आवश्यक काम बाहेक उनीहरुलाई बाहिर नजान आग्रह गर्नुभयो । बढी चिसो भएकोले गाउँपालिकाले निर्णय गरेर शुक्रबार सम्म सबै बिद्यालय बन्द गरेको र जेष्ठ नागरिकको हकमा गाउँपालिकाले कम्बल वितरण गरिरहेको र पालिकामा रहेका अन्य वडाहरुका जेष्ठ नागरिक सम्म पनि यो कार्यक्रम पु¥याईने बताउनु भयो ।
वडा नम्बर ७ का कार्यवाहक वडा अध्यक्ष दुखनी थारुको अध्यक्षतामा सम्पन्न कम्बल बितरण कार्यक्रममा गाउँपालिका उपाध्यक्ष शिवकान्ती चमार, ७ नम्बर वडाका वडा सदस्य परशुराम गुप्ता, रविन्द्र यादव, कान्ती हरिजन कार्यालय सहायक धनकुमारी पाण्डे लगायतले आआफ्ना भनाई राख्नुभएको थियो । कार्यक्रमको सञ्चालन वडा सचिव बबिता यादवले गर्नुभएको थियो ।
