परासी, १७ कात्तिक । प्रहरीले पश्चिम नवलपरासीका वडातहसम्म गुनासो पेटिका राख्ने अभियान सञ्चान गरेको छ । जिल्ला प्रहरी कार्यालयले राख्न लागेको गुनासो पेटिका जिल्लाका ७ स्थानीय तह र ७४ वडामा राखिने छ ।
रामग्राम नगरपालिकामा बुधबार गुनासो पेटिका राखेर प्रहरीले यो अभियान सुरुवात गरेको हो ।
गुनासो पेटिका राख्ने अभियानको सुरुवात गर्दै रामग्राम नगरपालिकाका प्रमुख नरेन्द्र कुमार गुप्ताले गुनासो पेटिकाले जनताले प्रहरीसँग गरेको अपेक्षा र सुधार गर्नुपर्ने विषयलाई सहजीकरण गर्न सहयोग पुग्ने बताउनु भयो ।
लुम्बिनी प्रदेश प्रहरी कार्यालयको निर्देशन अनुसार यो अभियान सञ्चालन गरिएको हो । जिल्ला प्रहरी कार्यालयका प्रहरी उपरीक्षक मनोज कुमार यादवले प्रहरी समक्ष पुगेर प्रत्यक्ष रुपमा आफ्ना समस्या राख्न धक मान्ने सर्वसाधारणलाई गुनासो पेटिका सुझाव र उजुरी सुन्ने माध्यमका रुपमा रहने बताउनु भयो ।
जनतासँग नजिक हुन प्रहरीले विभिन्न कार्यक्रम सञ्चालन गरेको स्मरण गराउँदै प्रहरी उपरीक्षक यादवले सामुदायिक प्रहरी साझेदारीको अवधारणलाई अझ बढी प्रभावकारी गराउन गुनासो पेटिकाले थप सहयोग पुग्ने विश्वास ब्यक्त गर्नुभयो । गुनासो पेटिकामा आएका सुझाव र उजुरीलाई हरेक महिनामा खोलिने र त्यसलाई कार्यान्वयनमा लगिने उहांले प्रतिबद्धता जनाउनु भयो ।
यसरी गुनासो पेटिका मार्फत आएका गुनासा र सुझावलाई सोझै जिल्ला प्रहरी प्रमुखदेखि प्रदेशहुँदै प्रधान कार्यालयमा पठाइने जिल्ला प्रहरी कार्यालयका सूचना अधिकारी प्रहरी नायब उपरीक्षक राजु लामाले जानकारी दिनुभयो ।
