गुल्मी पहिरोमा परी हराएका चारै जनाको शव फेला पर्यो

लिम्घा र ठूलोलुम्पेकमा गरी मृत्यु हुनेको संख्या १३ पुग्यो

संसार पोष्ट
गुल्मी, ९ साउन । गुल्मीको सत्यवती गाउँपालिका वडा नम्बर ४ लिम्घा र वडा नम्बर ३ ठूलो लुम्पेकमा गएको पहिरोमा परेर मुत्यृ हुनेको संख्या १३ पुगेको छ । मंगलबार राति परेको अबिरल बर्षाका कारण पहिरोमा परेर बेपत्ता भएका लिम्घाका ७ वर्षीया तारा विक र डेढ वर्षीय बालक सञ्जु विक तथा ठूलोलुम्पेकका माया विक र बबी विकको शव फेला परेसँगै मृतकको संख्या १३ पुगेको हो । उनीहरूको शवलाई जिल्लाबाट डाक्टरको टोली पठाई पोष्टमार्टम गरिएको छ । जिल्ला प्रहरी कार्यालय गुल्मीका प्रहरी निरीक्षक रबीन्द्रबहादुर खड्काका अनुसार हराईरहेका ३ जनाको बुधवार साँझ र एक जनाको बिहीबार बिहान शव फेला परेको हो ।
लिम्घामा मंगलबार निर्मला विक, पम्फा विक, अञ्जली विक, हिमान्सु विक, छली विक र सिवानी विक तथा ठूलोलुम्पेकमा तिल कुमारी तरामु मगर र उनका छोरा दर्शन तरामु मगर तथा दुर्गा बहादुर सिंजालीको शव फेला परेको थियो । पहिरोमा पुरिएर घाइते भएका ठूलोलुम्पेकका करिष्मा तरामु र धनी तरामुलाई दुई दिनपछि उपचारका लागि हेलिकप्टरमार्फत काठमाडौँ पठाइएको छ ।
पहिरो प्रभावित क्षेत्रमा सडक अबरुद्ध भएपछि बुधबार साँझ हेलिकोप्टरमार्फत केही राहत पहिरो प्रभावित क्षेत्रमा पठाईएको प्रमुख जिल्ला अधिकारी यदुनाथ पौडेलले जानकारी दिनुभयो । उहांका अनुसार हेलिकोप्टरले २० क्विन्टल चामल, दुई क्विन्टल दाल र एक क्विन्टल चिउरा ठुलोलुम्पेकमा छोडेको छ ।

पहिरोले ठूलो मानवीय तथा भौतिक क्षति पुर्याएपछि दुई स्थानका पहिरो प्रभावित परिवारलाई सुरक्षित स्थानमा सारिएको छ । सत्यवति गाउँपालिका ३ ठुलोलुम्पेकको सिङ्गदी गाउँनै पहिरोको उच्च जोखिममा रहेको गाउँपालिका अध्यक्ष पारिश्वर ढकालले वताउनु भयो । लुम्पेककै अन्य वस्ती पनि पहिरोको खतरामा रहेकाले सो क्षेत्रका प्रभावित परिवारलाई घरडाँडा,अस्लेवा रामबारी, धर्मपुर मावि, ढुंगा चाल्ने, भानु प्रावि र धर्मपुर प्राविमा व्यवस्थापन गरिएको अध्यक्ष ढकालले बताउनु भयो । त्यस्तै वडा ४ लिम्घाका पहिरो प्रभावित परिवारलाई स्थानीय सरस्वती माविमा व्यवस्थापन गरिएको छ । प्रभावित क्षेत्रमा नेपाली सेना, सशस्त्र प्रहरी र नेपाल प्रहरीको टोली परिचालित गरिएको छ ।