संसार पोष्ट
गुल्मी, ७ साउन । गुल्मीमा पहिरोमा पुरिएर ११ जनाको मृत्यु भएको घटनाप्रति परराष्ट्रमन्त्री प्रदिपकुमार ज्ञवालीले दुःख ब्यक्त गर्नुभएको छ । जिल्लाको सत्यवती गाउँपालिकाको ठूलो लुम्पेक र लिम्घामा पहिरोमा पुरिएर ११ जनाको ज्यान जानेगरी भएको घटनाप्रति दुःख ब्यक्त गर्दै मन्त्री ज्ञवालीले राहत र उद्धारमा जुटन आग्रह गर्नुभएको छ ।
गुल्मीको निर्वाचन क्षेत्र नम्बर १ अरन्तर्गत पर्ने लिम्घा र ठूलो लुम्पेकमा गएराती गएको पहिरोमा पुरिएर ११ जनाको मृत्यु भएको छ भने २ जना घाईते भएका छन् ।
गएराती देखि परेको अबिरल वर्षातका कारण घरमाथिबाट पहिरो जाँदा घरमा सुतिरहेकाहरुको मृत्यु भएको हो । उद्धारको लागि जिल्लाबाट प्रहरी नायव उपरिक्षक मिनबहादुर घले, शसस्त्र प्रहरी नायव उपरिक्षक दिनेश रामयमाझीसहितको टोली घटनास्थल पुगेको छ ।
थप राहत र उद्धारको लागि जिल्ला बिपद व्यवस्थापन समिति तयारी अवस्थामा रहेको प्रमुख जिल्ला अधिकारी यदुनाथ पौडेले बताउनुभयो । घटना स्थल जिल्ला सदरमुकाम तम्घासबाट पूर्वमा पर्दछ । घटना स्थल पुग्न ३ घण्टा बढि समय लाग्दछ ।
सत्यवति गाउँपालिका वडा नम्बर ४ को लिम्घामा एकाघरका ६५ वर्षिय छल्ली बिक, २८ बर्षिय पम्फा विक, १२ वर्षिय अञ्जली बिक, १० वर्षिय हेमन्त बिक, रुपा बिक, सिवानी बिक, निर्मला बिक, हिमान्सु बिक र सन्दीप बिक गरी ९ जनाको मृत्यु भएको छ । सोहि वडाका रुद्र बिकको घर पहिरोले बगाएको छ । पहिरोले घर बगाउँदा ४० वर्षिय मायाँ बिक र १६ वर्षिय गबि बिक बेपत्ता भएका छन् घने अन्य २ जना बेपत्ताको नाम थर खुल्न नसकेको प्रहरीले जनाएको छ ।
यस्तै पहिरोमा पुरिएर सत्यवति गाउँपालिका ३ ठूलो लुम्पेकमा ३२ वर्षिय तिलकुमारी त्रामु र ९ वर्षिय दर्शन त्रामुको मृत्यु भएको छ । उनीहरु आमा छोरा हुन् । पहिरोमा पुरिएर २ जना घाइते भएका छन् । प्रहरीका अनुसार सत्यवति ४ का १० वर्षिय करिश्मा त्रामु र १३ वर्षिय धनि त्रामु घाइते भएका छन् ।
