बुटवल, ४ चैत । बुटवल उपमहानगरपालिकामा ऐतिहासिक सम्पदा स्थल जितगढी र सांस्कृति शहर पुरानो बुटवल (बटौली) लाई जोड्ने गरी संग्राहालय निर्माण सुरु भएको छ । ऐतिहासिक जितगढी किल्लामा तत्कालिन नेपाल–अंग्रेज युद्धताकाको झल्को दिनेगरी निर्माण गर्न लागिएको संग्राहालय महत्वपूर्ण संरचना हो ।
जितगढी (बटौली) युद्ध संग्रहालयका नाममा निर्माण हुने उक्त महत्वपूर्ण संरचनाको बुधबार एक समारोहका बीच शिलान्यास भएको छ । उपमहानगरका प्रमुख शिवराज सुवेदीले उक्त संग्रहालयको शिलान्यास गर्नुभएको हो । राष्ट्रिय स्वाभिमान, पहिचान र शानको रुपमा रहेको जितगढीलाई बटौली पर्यटन केन्द्रका रुपमा लिंदै सोही अन्तर्गतको एउटा कामका रुपमा संग्राहालयलाई लिइएको प्रमुख सुवेदीले बताउनुभयो ।
प्रमुख सुवेदीले प्राचिन शहरले जन्माएका सबै उपशहरहरुलाई जोड्ने एउटै पर्यटन सर्किट बनाइने बताउँदै उहाँले बु्टवल चक्रपथ, तिनाउ–दानव कोरिडोर र छिमेकका पालिकाका सडक सञ्जालमा बुटवलको पर्यटन सर्किट जोडिने बताउनुभयो
।
बुटवलमा जनप्रतिनिधि निर्वाचित भएपछि बुटवलको आवधिक र दीर्घकालीन महत्वका योजना तय भएका छन् । अबको ५० वर्ष पछिको बुटवलको जनघनत्वलाई अनुमान गरेर एकिकृत शहरी विकासको गुरुयोजना बनाइएको छ । बुटवल वडा नं. १ को भैरव मन्दिर नजिकै रहेको करिब तीनकट्ठा जग्गामा उक्त संग्राहालय बन्नेछ । संग्राहालय चार तलाको बन्ने छ ।
पहिलो, दोस्रो र तेस्रो तलामा म्युजियम तथा चौथो तलामा परम्परागत खानाको परिकार समेत पाइने क्याफे रहने छ । यस्तै तल्लो तलामै बुटवललाई चिनाउने विभिन्न किसिमका सामान र मायाको चिनोहरु राखिएको शोभिनियर सप रहने छ ।
करिब छ करोड ८२ लाख ५० हजार दुई सय ५६ रुपैयाँ बराबरको लागतमा उक्त
संग्राहालय निर्माण हुनलागेको हो ।
