आन्दोलनमा उत्रिएका व्यवसायीको आन्दोलन स्थगित

बुटवल, ६ साउन । योगदानमा आधारित सामाजिक सुरक्षा ऐनर सामान ढुवानीमा भिसिटिएस सिष्टमका नियमहरु अव्यवहारिक भएको भन्दै बिरोधमा उत्रिएका रुपन्देहीका उद्योगी व्यवसायीहरुले बिरोधका कार्यक्रम स्थगित गरेका छन् ।
आईतबार अर्थ मन्त्रालयमा समस्या समाधान गर्न कार्यदल गठन गर्ने र कार्यदलले दिएका सुझावलाई सरकारले कार्यान्वयन गर्ने सहमति भएपछि आन्दोलनरत रुपन्देहीका व्यवसायिक सस्थाहरुको साझा सञ्जाल रुपन्देहीले तत्कालका लागि आन्दोलनका सबै कार्यक्रम स्थगित गरेको हो ।
सञ्जालको स्टेरिङ कमिटिको सोमबार बसेको बैठकले समितिले प्रतिवेदन बुझाउदा सम्मका लागि आन्दोलनका पुर्व घोषित कार्यक्रम स्थगित गर्ने निणर्य गरेको हो ।
सञ्जालले सोमबार बुटवल स्थित आन्तरिक राजश्व कार्यालय र राजश्व अनुसन्धान कार्यालय तथा मंगलवार जिल्ला प्रशासन कार्यालय रुपन्देही र आन्तरिक राजश्व कार्यालय भैरहवामा एक एक घण्टा धर्ना दिने कार्यक्रम तय गरेको थियो । घोषित सबै कार्यक्रम स्थागित गरिएको बुटवल उद्योग बाणिज्य संघका अध्यक्ष खिमबहादुर हमालले जानकारी दिनुभयो ।