संसार पोष्ट
बुटवल, ६ साउन । रुपन्देहीको ओमसतिया स्थित चनौदी बगाहा प्रहरी चौकीका इन्चार्ज प्रेमबहादुर थापा घुस सहित पक्राउ परेका छन् । अख्तियार दुरुपयोग अनुसन्धान आयोगको कार्यालय बुटवलको टोलीले प्रहरी सहायक निरीक्षक थापालाई स्थानीय व्यापारीसँग घुस लिदा लिदै पक्राउ गरेको हो ।
चौकी इन्चार्ज थापालाई रोहिणी गाउँपालिका १ स्थित एक रेष्टुरेन्टमा स्थानीय व्यापारीसँग ३५ सय रुपैयाँ घुस लिदै गरेको अवस्थामा अख्तियारको टोलीले आइतबार बेलुका ५.३० बजे पक्राउ गरेको हो ।
अख्तियार दुरुपयोग अनुसन्धान आयोग बुटवलका सूचना अधिकारी सुरेश भुसालका अनुसार पक्राउ परेका थापालाई घुस रकम सहित आवस्यक कार्बाहीका लागि काठमाडौको टंगाल स्थित अख्तियार दुरुपयोग अनुसन्धान आयोगको केन्द्रिय कार्यालयमा पठाइएको छ ।
