संसार पोष्ट
बुटवल, ६ साउन । नेपाली कांग्रेसले पार्टीका सस्थापक तथा प्रथम जननिर्वाचित प्रधानमन्त्री बिपी कोइरालाको ३७ औं स्मृति दिवस सोमबार देशभर विभिन्न कार्यक्रम गरेर मनाएको छ ।
बिपीको ३७ औं स्मृति दिवसको अवसरमा नेपाली कांग्रेस जिल्ला कार्यसमिति रुपन्देहीले बृक्षारोपण र बुटवल उप महानगर समितिले बिपीको शालिकमा माल्यार्पण गरेर मनाएका छन् ।
दिवसकै अवसरमा नैपाली कांगे्रस रुपन्देहीको आयोजनामा तिलोत्तमा नगरपालिका वडा नम्वर १७ स्थित बिपी ग्राम सेवा केन्द्रमा बृक्षारोपण गरिएको छ । पार्टी सभापति अब्दुल रज्जाकको सभापतित्व र प्रतिनिधि सभामा सार्बजनिक लेखा समितिका सभापति भरतकुमार शाहको प्रमुख आतिथ्यतामा बृक्षारोपण कार्यक्रम गरिएको हो । बृक्षारोपण कार्यक्रममा पार्टीका नेता, कार्यकर्ता, शुभेक्षुक संघ संस्था तथा भातृ संस्थाहरुका सहभागिता रहेको थियो ।
यस्तै बिपी स्मृति दिवसकै अवसरमा सोमबमर बिहान बुटवल उपमहानगर समितिले बुटवलको बिपी चोकमा रहेको स्व. बिपी कोईरालाको शालिकमा माल्यार्पण गरेर कोईरालाप्रति सम्मान प्रकट गरेको छ । कार्यक्रम नगर सभापति खेलराज पाण्डेकोे सभापतित्वमा भएको थियो ।
बृक्षारोपण तथा माल्यार्पण कार्यक्रममा बोल्ने पार्टीका नेता तथा वक्ताहरुले वर्तमान परिबेषमा बिपीको सान्दर्भिक्ता झन बढेर गएको र मुलुक अहिले पनि बिपीकै नीतिमा अघि बढेकोले पार्टीलाई थप बलियो बनाउन बिपीका बिचार र सिद्धान्तलाई आत्मसाथ गरेर अगाडि बढ्नुपर्ने आवश्यक्ता औंल्याएका थिए ।
