संसार पोष्ट
बुटवल, ४ साउन । प्रदेश पाँचको राजधानी बुटवलमा क्याम्पा कोरा २०१९ सम्पन्न भएको छ । साईकिल सिटी बुटवलको आयोजनामा साईक्लिङ्ग मार्फत पर्यटन प्रवद्र्धन र प्रचारप्रसार गर्ने उद्धेश्यले दोस्रो पटक आयोजना गरिएको क्याम्पा कोरा बुटवल उपमहानगरपालिका, तिलोत्तमा नगरपालिका, रोटरी क्लब अफ सेन्ट्रल बुटवल, बुद्ध साईकल, द्धारिका उदय सिनेमा र भ्यु सिनेमाको सहयोगमा सम्पन्न भएको हो ।
बुटवल ट्राफिक चोकबाट प्रदेशका उद्योग, वन, पर्यटन तथा वातावरणमन्त्री लिला गिरी, बुटवल उपमहानगरपालिकाका नगरप्रमुख शिवराज सुवेदीले साईकल चलाएर कार्यक्रमको शुरुवात गर्दै जल बिनायक मन्दिर र ऐतिहासिक सामरिक जितगढी किल्ला पुग्नु भएको थियो ।
बुटवल र तिलोत्तमा नगरका धार्मिक, पर्यटकिय, ऐतिहासिक स्थलहरु जोड्ने गरि ५० किलोमिटर दुरिको कोरा भएको क्लबका अध्यक्ष धिरेन तुलाधरले जानकारी दिनुभयो । साईक्लिङसंगै यस क्षेत्रको पर्यटकिय स्थलहरुको प्रचार प्रसार गर्ने उद्धेश्यका साथ कार्यक्रम गरिएको उहांले बताउनु भयो । साईकल र्यालीमा सहभागिहरुलाई जितगढी टोल विकास संस्था, मुक्तिनाथ धाम मन्दिर, ब्रह्मकुमारी पिस पार्क तथा रिटे«ट सेन्टर, नरेश्वर धाम मन्दिर समिति, नवजिवन युवा क्लबले स्वागत गरेका थिए ।
स्वागत कार्यक्रममा बह्मकुमारी ईश्वरीय विश्व विद्यालयकी कमला दिदिले भौतिकसंगै चारित्रिक अनुशासन पनि त्यत्तिकै जरुरी रहेको वताउनु भयो । कार्यक्रममा सहभागि तिलोत्तमा नगरपालिकाका नगरप्रमुख बासुदेव घिमिरेले पर्यटन भ्रमण वर्ष साकार पार्न गरिएको कार्यक्रमबाट आन्तरिक पर्यटक भित्राउन सहयोग पुग्ने बताउनु भयो ।
त्यस्तै रोटरी क्लब अफ सेन्ट्रल बुटवलका अध्यक्ष राजेन्द्र कार्की, कार्यक्रम संयोजक बिनोद जंग कार्की, जिल्ला साईक्लिङ संघका सचिव अशोक राई र कोषाध्यक्ष बिमल बस्नेतले सबैको सहयोगका कारण कार्यक्रम सफल भएको बताउनु भयो । कार्यक्रममा रुपन्देही र कपिलबस्तुका गरि दुई सय वढि साईकल यात्री सहभागि रहेका क्लवले जनाएको छ ।
