शाइन रेसुङ्गाको ७१ औं शाखा कपिलवस्तुको गोरुसिंगेमा

बुटवल,२५ मंसिर । शाइन रेसुङ्गा डेभलपमेण्ट बैंकले कपिलवस्तुको गोरुसिंगेमा शाखा कार्यालय सञ्चालनमा ल्याएको छ । राष्ट्रिय स्तरको विकास बैंकमा स्तरोन्नति भएसंगै बैंकले शाखा सञ्जाल विस्तार गर्ने क्रममा जिल्लाको बुद्धभूमि नगरपालिका वडा नंं. २ गोरुसिंगे बजारमा बिहीबारदेखि शाखा कार्यालय सञ्चालनमा ल्याएको हो । बैंकको यो ७१ औं शाखा हो ।
शाखा कार्यालयको बुद्धभूमि नगरपालिकाका प्रमुख केशवप्रसाद श्रेष्ठले उद्घाटन गर्नुभयो । सो अवसरमा नगर प्रमुख श्रेष्ठले शाइन रेसुङ्गा लुम्बिनी प्रदेशकै एक मात्र राष्ट्रियस्तरको विकास बैंक भएको र गोरुसिंगेमा नयां शाखा स्थापनाले नगरवासीहरु लाभान्वित हुने बताउनुभयो । शाखा कार्यालय उद्घाटन कार्यक्रममा बैंकका वरिष्ठ प्रबन्धक लालमणि पन्थी र गोरुसिंगे शाखा प्रमुख सन्तोष घिमिरेले शाखा कार्यालयबाट कृषि, ब्यापार, उद्योग र सेवा क्षेत्रमा सहुलियत दरमा कर्जा प्रवाहका साथै निक्षेपमा आकर्षक ब्याजदर तथा लकर र मोबाइल बैकिङ सुविधा रहेकाले लाभ लिन नगरवासीलाई आग्रह गर्नुभयो । कपिलवस्तुको चार नम्वर जितपुर र चन्द्रौटामा पनि शाइन रेसुङ्गा बैंकका शाखा कार्यालय रहेका छन् ।