कपिलवस्तुका ११ वर्षिय राहुल शाहनी सम्पर्कविहिन

कपिलवस्तु, १८ कात्तिक । कपिलबस्तु तिलौराकोटका ११ वर्षिय राहुल शाहनी सम्पर्कविहिन भएका छन् । ऐतिहासिक बुद्ध स्थल तिलौराकोट र बुद्धको जीवनीका विषयमा परिचय दिएर चर्चामा आएका ‘फुच्चे टुरिष्ट गाइड’ भनेर चिनिने कपिलवस्तु नगरपालिका–३ का शाहनी सोमबार विहान देखि सम्पर्कविहिन भएको उनका बुवा रिंकु शाहनीले बताउनु भयो ।
सोमबार विहान ९ बजे साइकल लिएर नजिकैको सिद्धार्थ ईंङ्गलिस बोर्डिङ्ग स्कूल जान हिँडेका उनी विद्यालयमा नगएको आफुलाई विद्यालयले जानकारी गराएको बुवा रिंकुले वताउनु भयो । बुवा रिंकुका अनुसार राहुलका साथी, छिमेकी र आफन्तहरुलाई सोधपुछ गरेपनि अहिले सम्म छोराको विषयमा कुनै जानकारी आएको छैन ।
गौतमबुद्धले २९ वर्ष बिताएको स्थल तिलौराकोट आउने विभिन्न देशका पर्यटकलाई बुद्धको जीवनी र यहाँको भौतिक संरचनाका विषयमा जानकारी गराउने राहुलमा नेपाली, हिन्दी, अँग्रेजी, चिनियाँ, थाईलगायत सात देशका भाषाको ज्ञान रहेको छ । घरवाट साईकल लिएर विद्यालय हिडेका र अहिले सम्म सम्पर्कमा नआएको बताउंदै राहुलका बुवा रिंकुले छोराको खोजी गरिदिन सबैसंग आग्रह गर्नुभएको छ ।