भैरहवा, २ साउन । रुपन्देहीका सातवटा व्यवसायिक संघसंस्थाले सामाजिक सुरक्षा योजना, अनिवार्य भ्याट र अनलाइन प्रणाली भेइकल एन्ड कन्साइनमेन्ट ट्रयाकिङ सिस्टम (भिसिटिएस) तत्काल लागू गर्न नसकिने जनाउँदै जिल्ला प्रशासन कार्यालयमार्फत् बिहिबार प्रधानमन्त्री केपी शर्मा ओलीलाई ज्ञापन पत्र बुझाएका छन् । बिहीबार सहायक प्रमुख जिल्ला अधिकारी भरतकुमार शर्मा मार्फत प्रधानमन्त्रीलाई ज्ञापन पत्र बुझाउँदै व्यवसायीले नयाँ प्रावधान लागू गर्दा त्यसलाई दीर्घकालीन गराउन व्यवसायीलाई थप समय दिइनु पर्ने माग गरे ।
समाजिक सुरक्षाकोष तत्काल लागू गर्न नसकिने र उद्योग–व्यवसायको मापदण्ड छुट्याइ फरक फरक तरिकाले लागू गर्नुपर्ने, भीसीटीएस सुरुमा भन्सारबाट आयात निर्यात गर्दा लागू गर्नु पर्ने र त्यो सफल भए मात्रै पूर्ण रुपमा लागू गर्नु पर्ने, ढुवानीको साधनमा लगाइएको १३ प्रतिशत भ्याट हटाउनु पर्ने लगायतका माग गरेका छन् ।
ज्ञापन पत्रमा बुटवल उद्योग बाणिज्य संघका अध्यक्ष खिमबहादुर हमाल, सिद्धार्थ उद्योग बाणिज्य संघका अध्यक्ष कुलप्रसाद न्यौपाने, नेपाल घरेलु तथा साना उद्योग महासंघ, रुपन्देही अध्यक्ष कन्हैयालाल कसौधन, रुपन्देही उद्योग संघका बरिष्ठ उपाध्यक्ष बाबुराम बोहरा, रुपन्देही व्यापार संघका अध्यक्ष पदमप्रसाद श्रेष्ठ, तिलोत्तमा चेम्बर अफ कमर्र्सका अध्यक्ष झविन्द्र कँडेल र उद्योग व्यापार संघ बुटवलका उपाध्यक्ष ज्योति भण्डारीले हस्ताक्षर गर्नुभएको छ । यी संस्थाहरुको साझा संजालले सामाजिक सुरक्षा योजना र भिसिटिएसका विरुद्ध सामूहिक धारणा बनाएर यसलाई सच्याउन माग गर्दै प्रधानमन्त्रीलाई ज्ञापन पत्र बुझाएका हुन् । ज्ञापन पत्र बुझ्दै सहायक प्रजिअ शर्माले उद्योगी–व्यवसायीका माग सहितको ज्ञापन पत्र विहिबार नै प्रधानमन्त्री कार्यालय पठाउने बताउनु भयो ।
