बुद्ध मूर्ति तोडफोडको चौतर्फी बिरोध, दोषि पत्तालगाई कारवाही गर्न माग

तिलोत्तमा, २ साउन । तिलोत्तमा नगरपालिकाले सिद्धार्थराजमार्ग अन्तर्गत छ लेन सडकको विचभागको डिभाइडरमा राखेका बुद्धका मूर्तिहरु तोडफोड गरिएको प्रति चौतर्फी विरोध भएको छ । विभिन्न राजनीतिक दल तथा सामाजिक संघ संस्थाहरुले विज्ञप्ति जारी गरेर घटनाको बिरोध जनाएका छन् ।
सिद्धार्थ राजमार्ग अन्तर्गत बुटवल बेलहिया छ लेन सडक खण्डको बीचभागमा रहेका ५ वटा बुद्धका मूर्ति बुधबार राति तोडफोड भएको थियो । सिक्सलेन सडकको शँकरनगर चोकदेखि नयाँमिलसम्म रहेका बुद्धमूर्ति तोडफोड गरिएको छ । बुद्धमूर्ति कस्ले किन तोड फोड गर्यो भन्ने अहिलेसम्म पत्ता लाग्न सकेको छैन । बुद्धका मूर्तिहरु तोडफोड गरिएको घटना प्रति नेपाली काँग्रेस संसदिय दलका प्रमुख सचेतक बालकृष्ण खाँड, प्रदेश ५ का अर्थ उद्योग तथा पर्यटन समितिका सभापति दधिराम न्यौपाने, तिलोत्तमा नगरपालिकाका प्रमुख बासुदेब घिमिरे, नेपाली काँग्रेस तिलोत्तमा नगर सभापति हरिलाल पाण्डे, नेकपा तिलोत्तमा नगर अध्यक्ष मोहन चापागाई, नेपाली काँग्रेस तिलोत्तमा १÷५ समन्वय समिति, तिलोत्तमा उद्योग वाणिज्य संघका अध्यक्ष गुणनिधि भण्डारी (माधव), तिलोत्तमा व्यापार संघका अध्यक्ष जेपि कँडेल, बुद्ध मूर्ति व्यवस्थापन समिति सिद्धार्थनगर नगरपालिकाका अध्यक्ष भरत पोख्रेललगायतले बिज्ञप्ति प्रकाशित गरी दोषिको पहिचान गरी कडा भन्दा कडा कारवाहीको माग गर्नुभएको छ । राजनीतिक दल, सांसद, नगरपालिका, तथा विभिन्न संघसंस्थाले जारी गरेका विज्ञप्ति तल हेर्नुहोला ।