कैदीबन्दी जैसवालको मृत्युको निष्पक्ष छानबिन गर्न जवाफदेहिता निगरानी समितिको माग

बुटवल ८ असौज
केन्द्रिय कारागार सुन्धारा काठमाण्डौमा बन्दी जीवन विताई रहेका रुपन्देही जिल्ला सिद्धार्थ नगरपालिका ५ निवासी ६३ बर्षिय रामलखन जैसवालको मृत्युको निष्पक्ष छानबिन गर्न जवाफदेहिता निगरानी समितिले माग गरेको छ ।
यही असोज ३ गते कोरोनाबाट मृत्युभई वीर अस्पतालमा राखिएको भनिएको घट्नालाई उहाँको परिवारले रोगबाट मृत्यु नभई हत्या गरिएकोे दावी प्रति जवाफदेहिता निगरानी समितिको गम्भीर ध्यानाकर्षण भएको जनाएको छ ।
केन्द्रिय कारागार विभाग तथा वीर अस्पतालका प्रशासनले जैसवालको मृत्यु हत्याबाट नभई कोभिडका कारणले भएको भनेर पत्रकार सम्मेलन मार्फत दाबी गरेपनि प्राप्त भिडिओवाट शंका गर्ने धेरै आधार भएको हुनाले उक्त घट्नालाई गम्भीरताका साथ छानबिन गरी तत्काल सत्यतथ्य सार्वजनिक गर्न नेपाल सरकारसमक्ष निगरानी समिति आग्रह गरेको छ ।
यस घट्नाबाट मुलुकका विभिन्न कारागारमा संवेदनशील तथा जोखिम अवस्थामा रहेका कैदीबन्दीलाई कोभिडको कारणले परिवार लगायत कसैसँग भेट गर्न बन्देज लगाइएको अवस्थामा शंकास्पद घटनाहरु हुन सक्ने मात्र नभएर कोभिड संक्रमणको नाममा हत्यासमेत हुने त्रास उब्जिएबाट केन्द्रिय कारागार लगायत मुलुकका विभिन्न कारागारमा रहेका कैदीबन्दीको सुरक्षाको व्यवस्था गर्न माग गरिएको छ ।
त्यस्तै कारागारमा कोभिडको संक्रमणको जोखिम कम गर्न कैदीबन्दीहरुको चाप कम गर्न सर्वोच्च अदालतले दिएको आदेशको पालना गर्न, कैदीबन्दीहरुलाई कोभिडको संक्रमणबाट बचाउने अन्य आवश्यक उपायहरु गम्भीरताका साथ अवलम्बन गर्न, कारागार व्यवस्थापनमा सुधार गर्न तथा सुरक्षित पूर्वक बाँच्न पाउने अधिकारको प्रत्याभुत र सम्मान गर्न सरकार तथा सम्बन्धित निकायहरुसमक्ष जोडदार माग गरिएको छं ।
साथै, बन्दी जैसवालको शंकास्पद मृत्यु भएको घटनाको निष्पक्ष छानविन तथा अनुसन्धान गरी हरेक नागरिकको सम्मानपूर्वक बाँच्न पाउने अधिकारको रक्षा गर्न र यदि हत्या भएको ठहर भएमा दोषीमाथि कानुन बमोजिम कारवाही गरी पीडित तथा तिनका परिवारलाई न्याय दिलाउन संस्थाका संयोजक चरण प्रसाईद्धारा जारी विज्ञप्तिमा सरकारसमक्ष हार्दिक अपिल गरिएको छं ।