आजदेखि मलमास शुरु, शुभ र मंगल कार्य गर्न वर्जित

बुटवल, २ असोज । हिन्दू परम्परा अनुसार आज (शुक्रबार) बाट मलमास शुरु भएको छ । सौर्यमास अर्थात् संक्रान्ति देखि मसान्तभित्र दुईवटा औंशी पर्न गए या दुईवटा औंशीको विचमा सूर्य संक्रान्ति परेन भने यो महिना महिना अधिकमास हो । यसैलाई मलमास भनिन्छ । आजदेखि शुरु भएको मलमास असोज ३० गते राति १ बजेर ५३ बजेसम्म रहने छ ।
पौराणिक मान्यता अनुसार यस अधिकमासको अधिपति भगवान् विष्णु भएकाले यस महिनालाई पुरुषोत्तममास पनि भनिन्छ । मलमासकै कारण यस वर्षको दशैं र तिहार जस्ता महान चाड १ महिना पछि सरेका छन् ।
सनातन धर्ममा अधिकमासको समयमा शुभ र मंगल कार्य गर्न वर्जित गरिएको छ । मलमासमा शिलान्यास, गृहप्रवेश, व्रतबन्ध, विवाह, यज्ञ, काम्यकर्म र नयाँ कार्यको थालनी गर्न शास्त्रले निषेध गरेको छ । मलमास भरी नवजोडी सँगै बस्नु र विशेषगरी मलमासमा गर्भाधान गर्नुपनि नराम्रो मानिन्छ ।
मलमासमा विवाह, व्रतबन्ध, पक्ष अनुष्ठान, पुराणवाचन, कुनै पनि काम्य कर्म, मुहूर्त जुराएर गर्ने काम, गृह प्रवेश, नयाँ तीर्थको यात्रा, नयाँ व्यवसाय सुरु, नयाँ व्रतको सुरुवात र नयाँ संरचना निर्माणको थालनी गर्न अशुभ मानिन्छ ।
यस्तै घरमा गरिने नियमित पूजापाठ, मन्दिर दर्शन, तिथि, बार या नक्षत्र मिलेर गर्ने योगहरु नित्य कर्म, नियमित गरिँदै आएको व्रत, निस्काम भावले गरिने बिहानी सत्संग, विष्णुको स्तुति र कीर्तन, न्वारन, पास्नी जस्ता कार्य गर्न गर्न मिल्ने बताइएको छ ।