रामकुमार श्रेष्ठ
नवलपरासी, १८ साउन । संघीय सरकारले कोरोना संक्रमितहरुलाई १४ दिन आइसोलेसनमा राखेर पुन पिसिआर परीक्षण नगरी पठाउने निर्देशिका जारी गरको छ । तर गण्डकी प्रदेश सरकारले भने आफ्नै खर्चमा संक्रमितहरुको पिसिआर परिक्षण गरी रिपोर्ट नेगेटिभ आएपछि मात्र घर फर्काउने नीति लिएको छ ।
यस्तो नीति लिएको गण्डकी प्रदेशका मुख्य मन्त्री पृथ्वीसुब्बा गुरुङले पूर्वी नवलपरासी पुगेर कोरोना विरुद्धको लडाइ जितेकालाई अस्पतालबाट विदाई गर्नुभएको छ ।
पूर्वी नवलपरासीको रहजर स्थित प्राकृतिक चिकित्सालयमा रहेका संक्रमितहरु मध्ये शनिबार निको भएका २३ जनालाई विदाई गर्न मुख्यमन्त्री गुरुङ शनिबार राति अस्पताल पुग्नुभएको हो । संक्रमितहरु निको भएर समुदायमा फर्कन पाउँदा उनीहरुको उत्साह युद्ध जिते भन्दा कम थिएन । उनीहरु नाच्दै गाउंदै रमाउँदै घर फर्किएका थिए ।
संक्रमितहरु अधिकांश घरको आर्थिक अवस्था कमजोर भएपछि घर परिवार पाल्ने सपना देखेर विदेश गएका थिए । फर्किदा उनीहरु कोरोना भाइरस बोकेर नेपाल आए । कोही भारतबाट जन्मभूमि फर्किएका थिए भने कोही खाडी मुलुकबाट ।
रजहरको प्राकृतिक चिकित्सालयमा अहिलेसम्म ३ सय १५ जना संक्रमितहरुको उपचार गरिएकोमा २ सय ९४ जना निको भएर घर फर्किएका छन् भने आइतबार थप ३ जनाको पिसिआर रिपोर्ट नेगेटिभ आएपछि विदाई गरिएको छ । यहाँ अब जम्मा २१ जना मात्र संक्रमितहरु उपचाररत रहेका छन् । ती मध्ये पनि कतिपय आजभोलि नै विदा हुने तयारीमा छन् । यहाँ उपचार गरिएका मध्ये कतिपय ७ दिनमा निको भएर फर्किएका छन् भने कतिपय ४०÷४५ दिनसम्म उपचार गरेर पुर्णरुपमा निको भएर मात्र फर्किएका छन् ।
शनिबारराती निको भएर घर फर्किनेहरुमा ४ बर्षका बच्चा देखि आफ्नो लाउँलाउँ र खाउँखाउँको उमेरमा अर्काको देशमा पसिना बगाएर फर्कनेहरु पनि थिए । संक्रमितहरु निको भएर समुदायमा फर्कन पाउँदा कतिपय यतिसम्म खुसी थिए कि विदाई कार्यक्रममा सहभागि मुख्यमन्त्री र उपचाररत डाक्टरहरुलाई भगवान सरह मानेर खुट्टा ढोगगर्न सम्म भ्याएका थिए ।
कार्यक्रममा कोरोना भाइरस विरुद्धको लडाइ जितेकाहरुलाई विदाई र उपचारमा सम्लग्न स्वास्थ्यकर्मीहरुलाई सम्मान गर्दै मुख्य मन्त्री गुरुङले कोरोना भाइरस विरुद्धको लडाईमा नेपालले चिताएको जस्तो सफलता प्राप्त गरेको बताउनुभयो ।
रजहरको प्राकृतिक चिकित्सालय नेपालमा एक मात्र यस्तो स्थान हो जहां संक्रमितहरुलाई प्राकृतिक पद्दतिबाट उपचार गरिएको छ ।
यस्तै पूर्वी नवलपरासीमा ५ बर्षीय बालकले कोरोना विरुद्धको लडाइ जितेका छन् । आइतबार उनको पिसिआर रिपोर्ट नेगेटिभ आएपछि उनलाई विदाई गरिएको छ । गैडाकोटका ५ बर्षीय बालक सहित बौदीकाली गाउँपालिकाका १ जना पुरुष र मध्यविन्दु नगरपालिकाका १ जना पुरुषले आइतबार कोरोना भाइरस विरुद्धको लडाई जितेका हुन् ।
यसैबीच नवलपुरमा आइतबार थप ३ जनामा कोरोना संक्रमण पुष्टि भएको छ । नवलपुरको हुप्सेकोट गाउँपालिकाका ३ जनामा कोरोना भाइरस पोजेटिभ देखिएको हो । आइतबार थपिएका संक्रमित सँगै नवलपुरमा संक्रमितको संख्या ३ सय २७ पुगेको छ भने ३ सय ६ जना निको भएर फर्किएका छन् ।
