बुटवल, २४ असार । लायन्स क्ल्ब अफ मणिग्रामले रुपन्देहीको तिलोत्तमा नगरपालिका मणिग्राम स्थित रामचन्द्र मैनादेबी अनाथ आश्रममा खाद्यान्न र मास्क प्रदान गरेको छ ।
गुरु पुर्णिमाको अवसर पारेर लायन्स क्ल्ब अफ मणिग्रामले अनाथ तथा असहाय महिला कल्याण समाजद्वारा संचालित तिलोत्तमा–६ मणिग्राम स्थित अनाथ आश्रममा खाद्यान्न र मास्क प्रदान गरेको हो ।
सामाजिक र मानविय सेवाका क्षेत्रमा क्रियाशिल लायन्स क्ल्ब अफ मणिग्रामले क्लवको पहिलो बर्षको सेवा कार्यक्रम र सामाजिक उत्तरदायित्व अन्तर्गत अनाथ आश्रमलाई २० हजार रुपैयाँ बरावरको खाद्यान्न र मास्क प्रदान गरेको हो ।
क्लबका अध्यक्ष एम जे एफ सूरजकुमार लम्साल, कार्यक्रमका प्रमुख अतिथि एरिया चिफ सन्दिप कसौधन, जोन चेयर पर्सन डा. प्रकाश पान्डेलगायतले खाद्यान्न र मास्क अनाथ आश्रमकी संचालक मैनादेबी भण्डारीलाई हस्तान्तरण गर्नुभएको थियो ।
क्लवका प्रथम उपाध्यक्ष प्रकाश भण्डारीले स्वागत तथा सचिव चोलाप्रसाद पाठकले सञ्चालन गर्नुभएको कार्यक्रममा आश्रमकी संचालक भण्डारीले सबैको साथ र सहयोगले अनाथ आश्रम सञ्चालन गर्न सहज भएको भन्दै खाद्यान्न र मास्क प्रदान गरेकोमा क्लवलाई धन्यवाद ज्ञापन गर्नुभयो । उहांले आगामी दिनमा पनि सहयोगका कार्यक्रमलाई निरन्तरता दिन क्लवका पदाधिकारी तथा सदस्यहरुलाई आग्रह गर्नुभयो ।
क्लवका अध्यक्ष सूरजकुमार लम्सालले एकातिर कोरोना भाइरसको उच्च जोखिम र अर्कोतर्फ बन्दावन्दीको अवस्थामा सामाजिक दुरी कायम गर्दै सेवाका कार्यक्रमलाई अगाडी वढाउंदै आएको क्लवले यो बर्षको पहिलो कार्यक्रम अन्तर्गत अनाथ आश्रममा सहयोग गरिएको बताउनु भयो । उहांले ‘जहाँ आवश्यकता, त्यहाँ लायन्स’ भन्ने नारालाई आत्मसाथ गर्दै आगामी दिनमा पनि मानविय र सामाजिक सेवाका क्षेत्रमा क्रियाशिल रहने प्रतिवद्धता जनाउनु भयो ।
