तिलोत्तमाको कुञ्जपार्कमा दुईदिने चित्रकला कार्यशाला

बुटवल, ५ असार । रुपन्देहीको तिलोत्तमा नगरपालिकामा दुईदिने चित्रकला कार्यशाला शुरु भएको छ । नेपाल कमर्शियल आर्टिस्ट संघको आयोजना र तिलोत्तमा नगरपालिकाको सहयोगमा तिलोत्तमा–६ कुञ्जपार्कमा चित्रकला कार्यशाला शुरु भएको हो ।
कार्यशालामा सहभागि दुईजना महिलासहित रुपन्देहीका २५ जना कलाकारले स्थानीय आदिवासी–जनजाति, कला, संस्कृति र परम्परालाई क्यानभासमा उतार्नेछन् ।
कार्यशाला उद्घाटन गर्दै तिलोत्तमा नगरपालिकाका नगरप्रमुख बासुदेव घिमिरेले प्राचीन कला संस्कृतिलाई संरक्षण गर्दै नयाँ पुस्तालाई चिनाउने उद्देश्य सहित कार्यशालालाई नगरपालिकाले प्रायोजन गरेको बताउनुभयो । नगरपालिकाले कार्यशालाका लागि दुई लाख आर्थिक सहयोग गरेको छ ।
कलाकारले दुई दिन लगाएर तयार गर्ने २५ वटा चित्रकलालाई नगरपालिकाको तिलोत्तमा–६ मा बनेको नयाँ प्रशासनिक भवनमा आम नगरवासीले देख्ने ठाउंमा राखिने नगरपालिकाका प्रवक्ता सुरेन्द्र श्रीले बताउनुभयो ।
नेपाल कमर्शियल आर्टिस्ट संघका अध्यक्ष बेनप्रसाद थापाले संघको २५ औं वार्षिकोत्सव एवं रजत महोत्सवको अवसरमा कार्यशाला आयोजना गरिएको बताउनुभयो ।