बुटवल, २३ जेठ । रुपन्देहीको बुटवलस्थित गौतमबुद्व सामुदायिक मुटु अस्पतालले आगामी असार १ गतेदेखि डायलाइसिस सेवा बन्द गर्ने समाचारप्रति राष्ट्रिय जनमोर्चाले ध्यानआकर्षित भएको बताएको छ । डायलाइसिस सेवाका लागि उपलब्ध गराउने आर्थिक सहयोग तत्काल उपलब्ध गराउन राष्ट्रिय जनमोर्चा रुपन्देहीले सरकारसंग माग गरेको छ । सरकारले उपलब्ध गराउने अनुदान रकम रोकिएका कारण सेवा बन्द गर्नुपर्र्नेे स्थिति आउनु दुःखद् विषय भएको राष्ट्रिय जनमोर्चा रुपन्देही अध्यक्ष बद्रे आलम र सचिव टानबहादुर केसीले शुक्रबार जारी गरेको विज्ञप्तिमा उल्लेख छ ।
विगतदेखि अस्पतालले दिंदै आएको निःशुल्क डायलाइसिस सेवा बन्द गर्न नहुने र सेवा बन्द हुने अवस्था आउनु भनेको सरकार गैर जिम्मेवार बनेको विज्ञप्तिमा उल्लेख गरिएको छ । कुनैपनि बहानामा बिरामीहरु सेवावाट बन्चित हुन नहुने र अस्पतालले पाउनु पर्ने रकम तुरुन्त उपलब्ध गराई सहजरुपमा डायलाइसिस सेवा सुचारु गर्ने वातावरण सरकारले बनाउनु पर्ने राष्ट्रिय जनमोर्चाको माग छ ।
अस्पताल सञ्चालकहरुलाई सम्बन्धित पक्षसंग वार्ता वा संवादको माध्यमवाट समस्याको समाधान गर्न विज्ञप्तिमार्फत अनुरोध गरिएको छ । सरकारबाट प्राप्त हुनुपर्ने रकम भुक्तानी नभएको भन्दै गौतमबुद्ध सामुदायिक मुटु अस्पताल बुटवलले मृगौलाका विरामीहरुलाई उपलब्ध गराउंदै आएको डायलाइसिस सेवा असार देखि बन्द गर्ने बताएको छ । डायलाईसिस जस्तो महत्वपूर्ण सेवालाई आर्थिकको अभावमा रोक्नै नहुने र अझै सहज सेवाका लागि सरकार र अस्पताललाई गम्भीर बन्न राष्ट्रिय जनमोर्चा रुपन्देहीले आग्रह गरेको छ ।
विपन्न वर्गका नागरिकलाई मृगौलाको डायलाईसिस तथा मुटु, क्यान्सर लगायतका विरामीलाई उपचारमा सहुलियत दिने सरकारको घोषणा अनुरुप मुटु अस्पतालले विगत ४ वर्षदेखि निशुल्क डायलाईसिस सेवा उपलब्ध गराउंदै आएको छ । विपन्न वर्गका विरामीलाई डायलाईसिस सेवा उपलब्ध गराए वापत अस्पतालले सरकारवाट प्राप्त गर्नुपर्ने पौने आठ करोड रकम भुक्तानी नपाएको भन्दै अस्पतालले सेवा वन्द गर्ने जनाएको छ ।
विपन्न वर्गका नागरिकको लागि नेपाल सरकारले उपचारमा दिने सहुलियतका लागि मुटु अस्पताल सूचिकृत भई २०७३ साल पुष १७ गतेदेखि निशुल्क डायलाईसिस सेवा संचालन गर्दै आएको छ । मुटु अस्पतालमा साढे ३ सय जना विरामीले निशुल्क डायलाईसिस सेवा र चालु आर्थिक वर्षको ११ महिनामा विपन्न वर्गका २ सय ६३ विरामीले सहुलियतमा मुटुको उपचार सेवा लिएका छन् ।
