काठमाडौं, ३० असार । नेपाली काँग्रेसले केन्द्रीय कार्यसमिति बैठकमा उठेका विवादलाई पछि सहमतिमा परिमार्जन गर्ने गरी पार्टी नियमावली पारित गरेको छ । असार २२ गते देखि पार्टी कार्यालय सानेपामा बसेको केन्द्रीय समिति बैठकले मस्यौदामाथि उठेका असन्तुष्टिलाई पछि समेट्ने गरी नियमावली सर्वम्मतिले पारित गरेको हो । बैठकले केन्द्रीय सदस्यहरूका सुझाव समेट्न मस्यौदा समितिलाई पुनः निर्देशन दिएको छ ।
नियमावलीको नियम २७ को (च) मा ‘पार्टीको नीति, सिद्धान्तमा आघात पर्ने वा पार्टीको मान प्रतिष्ठा र इज्जतमा आँच पुग्ने खालका सार्वजनिक अभिव्यक्ति दिएमा वा कुनै पनि माध्यमबाट लेख, रचना वा अन्य सामग्री प्रकाशित गरेमा’ अनुशासनको उल्लंघनमा कारबाही हुने व्यवस्था गरिएको छ । उक्त व्यवस्थाप्रति संस्थापन इतर पक्षले विमत्ति जनाएको हो ।
आइतबारको बैठकमा २१ जना केन्द्रीय सदस्यले नियमावलीका प्रावधानमा आफ्नो धारणा राख्नुभएको थियो । यसअघि शुक्रबारको बैठकमा वरिष्ठ नेता रामचन्द्र पौडेलसिहत १८ जनाले आफ्नो धारण राख्नुभएको थियो ।
केन्द्रीय समिति बैठकमा लेबी, अनुशासनको कारबाहीमा कडा प्रावधान, भातृ संस्थामा पार्टीका अनावश्यक हस्तक्षेप र प्रशिक्षण प्रतिष्ठानलाई समानान्तर शैलीमा चलाउन खोजेको जस्ता विषयमा केन्द्रीय सदस्यहरूले फरक–फरक धारणा व्यक्त गर्नुभएको थियो ।
यसैबीच, अविरल वर्षा र पहिरोका कारण भएको जनधनको क्षतिलाई मध्यनजर राख्दै केन्द्रीय समिति बैठक साउन ७ गतेसम्मलाई स्थगित गरी उद्धार र राहतमा समर्पित हुने निर्णय काँग्रेसले गरेको छ ।
