श्यामलाल पोखरेल
बुटवल, २८ बैशाख । नेपालको भूमिमाथि भारतले निरन्तर अतिक्रमण गरिरहेको नेकपा (मसाल)ले बताएको छ । भारतीय पक्षबाट नेपालको सार्वभौमिकता र अखण्डतामा खतरा रहेको मसालले बताउंदै आएको छ । पछिल्लो समय कालापानी क्षेत्रको लिपुलेक तथा लिम्पियाधुरामा नेपालको अनुमति वा सहमति बिना सडक खोल्ने कार्यले भारतले नेपालमाथि हस्तक्षेप गरेको पुष्टि भएको नेकपा मसालका महामन्त्री मोहनविक्रम सिंहले बताउनु भएको छ । नेपालमाथि भएको हस्तक्षेपका बिरुद्द सबै नेपालीलाइ एक हुन मसालले आग्रह गरेको छ ।
यस्तै रुपन्देहीमा क्रियाशील नेकपा मसाल सहितका विभिन्न राजनीतिक दलले कालापानी क्षेत्रको लिम्पियाधुरामा भारतले सडक खोलेकोप्रति बिरोध गरेका छन् । नेकपा (मसाल) रुपन्देही, राष्ट्रिय जनमोर्चा रुपन्देही, नेपाल कम्युनिष्ट पार्टी रुपन्देही, क्रान्तिकारी माओवादी रुपन्देही, नेपाल कम्युनिष्ट पार्टी माले रुपन्देही, देशभक्त जनगणतान्त्रिक मोर्चा नेपाल, रुपन्देही, नेपाल कम्युनिष्ट पार्टी माओवादी केन्द्र रुपन्देही, राष्ट्रिय जागरण परिषद नेपाल र राष्ट्रिय जनमुक्ति पार्टी रुपन्देहीले संयुक्त विज्ञप्ति जारी गरी नेपाली भूमि माथि भारतीय हस्तक्षेप भएको भन्दै बिरोध गरेका छन् । नेपाली भूमिमा नेपालको सहमति बिना खोलिएको बाटो तत्काल बन्द गरी आफ्नो भूमिको संरक्षणका लागि कुटनीतिक पहल गर्न सरकारसंग रुपन्देहीमा क्रियाशिल राजनीतिक दलको माग छ । त्यस्तै नेकपा (मसाल), नेकपा (क्रान्तिकारी माओवादी), नेकपा (माले), राष्ट्रिय जनमोर्चा, देशभक्त जनगणतान्त्रिक मोर्चा नेपाल, नेपाल कम्युनिस्ट पार्टी, नेकपा (माओवादी केन्द्र), जनसमाजवादी पार्टी, नेकपा (संयुक्त) र जनजागरण परिषद नेपाल लगायत केन्द्रिय १० दलले पनि संयुक्त विज्ञप्ती जारी गरी भारतीय हस्तक्षेपबारे तुरुन्त आफ्नो स्थिति स्पष्ट गर्नका लागि सरकारलाइ आग्रह गरेका छन् । रााष्ट्रियताको सवालमा संयुक्त आन्दोलन गर्दै आएका १० दलद्वारा जारी वक्तव्यमा ‘विवादलाई वार्ताको माध्यमद्वारा समाधान गर्ने कुरा भारतले बताइरहेको पृष्ठभूिममा कालापानी क्षेत्रमा भारतले नेपालको अनुमति वा स्वीकृति बिना निर्माण गरेको सडक उसको नेपालमाथि हस्तक्षेपको नांगो उदाहरण’ भएको विज्ञप्तिमा उल्लेख गरिएको छ ।
