बुटवल, ९ बैशाख । अन्य स्थानीय निकाय भन्दा पृथक गतिविधिका कारण चर्चामा आइरहने रुपन्देहीको तिलोत्तमा नगरपालिकाले कोरोना भाइरसको माहामारी सम्वन्धि जनचेतनामुलक म्युजिक भिडियो सार्वजनिक गरेको छ ।
बिश्वभर महामारीको रुपमा फैलिएको कोरोना भाइरस (कोभिड–१९) रोगबाट बच्नका लागि आम नेपालीमा सचेतना जगाउने उद्देश्यले तयार पारिएको ‘कोरोना महामारी’ म्यूजिक भिडियोको नगरप्रमुख बासुदेव घिमिरेले सार्वजनिक गर्नुभएको हो । तिलोत्तमा नगरपालिकाको प्रस्तुति रहेको उक्त म्यूजिक भिडियो मार्फत देशमा भएको स्वास्थ्य सुविधा, स्रोत–साधन, जनशक्ति, कोरोना भाइरसको सँक्रमण नियन्त्रण र उपचारका लागि स्वभाविक रुपमा अपुग भएको अवस्थामा कोभिड–१९ को रोकथाम तथा नियन्त्रणमा जनताको आफ्नै जागरुकता, अनुशासन, रणनीति र पहल महत्वपूर्ण भएकाले सोही कार्यलाई अनुसरण गर्न आग्रह गरिएको छ ।
‘घरभित्रै रहेर कोरोना महामारीलाई जित्न सकिन्छ । यो समयमा अत्यावश्यक काम बाहेक बाहिर ननिस्कौ ।’ भन्ने सन्देश भिडियो मार्फत दिइएको छ ।
म्यूजिक भिडियो सार्वजनिक गर्दै तिलोत्तमा नगरपालिकाका प्रमुख बासुदेव घिमिरेले यस म्यूजिक भिडियोले दर्शक श्रोताहरुमा मनोरन्जनका साथै मनोबल बढाउन महत्वपुर्ण भूमिका खेल्ने बताउनु भयो । कोरोनाको अचुक औषधी भनेकै आत्मवल बढाउनु भएकोले सबैले आफ्नो मनोवललाई दह्रो पार्नुपर्नेमा उहाँको जोड थियो ।
यस भिडियो सन्देशले आफु सुरक्षित रहेर आफ्नो समाजलाई सुरक्षित राख्न र कोरोना भाइरसको संक्रमण नियन्त्रण र रोकथाममा लागेका विभिन्न सँघ संस्थाहरुसँग सहकार्य र समन्वय गर्न, सबै नेपालीहरुलाई एकताबद्ध भई अगाडी बढ्न तथा कोरोनालाई जित्न प्रेरित गर्ने छ भन्ने अपेक्षा लिएको नगर प्रमुख घिमिरेले बताउनु भयो ।
राजु विकेको शब्द÷संगित रहेको यस म्युजिक भिडियोमा चर्चित गायिका एन्जिला रेग्मी, नवोदित गायकहरु नमन सुनार र प्रसन्न पछाइ क्षेत्रीले आवाज भरेका छन् भने निर्देशक मनिष पन्थले छायांकन, निर्देशन र सम्पादन गरेका छन् । भिडियोमा स्पन्दन पन्थ, स्वभाव पन्थ, कमला पन्थ र अभिषेक तिवारीको अभिनय रहेको छ ।
नारायण वि.पि. परियारको कन्सेप्ट रहेको उक्त म्यूजिक भिडियो तयार गर्न फाइन मिडिया बुटवल, जय माता दि फाउण्डेशन, अर्जुन खरेल लगायतको विशेष भूमिका रहेको गितका रचनाकार राजु विकेले बताए । उक्त म्यूजिक भिडियो श्रीनगर फिल्मसको यूट्यूबमा समेत सार्वजनिक भएको छ ।
