तिलोत्तमा, २४ चैत । लकडाउनको कारण रोजी रोटी गुमेका तिलोत्तमा नगरपालिका वडा नं. २ का ११७ घर परिवारलाई स्थानीय क्लवले राहत वितरण गरेको छ । नवज्योति क्लब तिलोत्तमा २ रुपन्देहीले स्थानीय स्तरमा सहयोग स्वरुप उठाएको राहत तथा सहयोग सामाग्री तिलोत्तमा नगरपालिकाको समन्वयमा स्थानीय तथा घरबहालमा बसेका बिपन्न परिवारहरुलाई राहत वितरण गरिएको क्लवका अध्यक्ष दिपेश कंडेलले बताउनुभयो ।
तिलोत्तमा नगरपालिका तथा वडा नं.२ का जनप्रतिनिधि एवं टोल बिकास संस्थासंगको सहकार्यमा तिलोत्तमा २ का करिब १ सय ७७ घरधुरीमा बसोबास गर्नेहरुको विवरण टिपेर सामाजिक दुरी कायम गरि राहत वितरण गरिएको अध्यक्ष कंडेलले बताउनुभयो । राहतमा चामल १० के.जी.,दाल २ के.जी, तेल आधा लि.र नुन १ के.जी.वितरण गरिएको थियो ।
क्लबले तिलोत्तमा वडा न.२ का त्रिशक्ति पशुपति टोल बिकास संस्थाका १६ परिवार, जागृति टोल बिकास संस्थाका १२ परिवार, संसारीमाई टोल बिकास संस्थाका ७ परिवार, सिद्देश्वर टोल बिकास संस्थाका २६ परिवार, शिवालय टोल बिकास संस्थाका १८, मध्यबिन्दु टोल बिकास संस्थाका १२ परिवार, सगरमाथा टोल बिकास संस्थाका ८ परिवार, लक्ष्मी टोल बिकास संस्था १२ परिवार, मालिका टोल बिकास संस्थाका ६ परिवार गरि जम्मा १सय १७ परिवारलाइ राहत वितरण गरिएको हो ।
तिलोत्तमा स्थित दुर्गादत्त माविको प्राङ्गण र तपाह स्थित शिवालय मन्दिरबाट राहत सामाग्री वितरण गरिएको क्लवका विदुर केसीले जानकारी दिनुभयो । क्लबले तिलोत्तमा वार्ड नं. १ मा राहत लिन छुटेका र नाम टिपाएका बिपन्न परिवारका लागि भोलि चैत २५ गते बिहान ८ बजे दुर्गादत्त मावि शारदा स्कूलको प्रांँगणमा संकलित राहत वितरण गर्ने कार्यक्रम रहेको क्लवले जनाएको छ ।
