बुटवल, ११ चैत । रुपन्देहीको सैनामैना नगरपालिकाका एक व्यवसायी बिभिन्न ब्यक्तिको करिव तीन करोड रुपैयाँ ठगेर फरार भएका छन् । सैनामैना नगरपालिका वडा नम्वर ४ मुर्गिया निवासी ५० वर्षिय उत्तमबहादुर श्रेष्ठ स्थानीय ७७ जना व्यक्तिबाट लिएको दुई करोड ९५ लाख ७० हजार रुपैयाँ नतिरी मुर्गियाबाट भागेका हुन् । उनले विभिन्न वहाना बनाएर उक्त रकम लिएका थिए ।
मुर्गियामा रहेका घर र पसल बेचेर परिवारसहित श्रेष्ठ भागेको थाहा पाएपछि मात्र श्रेष्ठलाई रकम दिनेहरुले आफुहरु ठगिएको थाहा पाएका हुन् ।
मुर्गिया बजारमा दुईवटा पक्की घर, फेन्सी र फलफूल पसल राखेका श्रेष्ठले रकम तिर्ने विश्वासमा उनलाई रकम दिएको पीडितहरु बताउछन् । श्रेष्ठले कसैसंग छोरालाई जापान पठाउन, कसैसंग पसलमा सामान थप्न, कसैसंग घडेरी किन्न, कसैसंग छोरीको छोडपत्र हुन लागेको समस्या देखाएर त कसैसंग बुटवलमा फाइभ स्टार होटल किन्ने बहाना बनाएर रकम मागेका थिए । व्यवसायी, सरकारी जागिरेदेखि अपाङ्गता भएका सिधासाधा गृहिणी र बृद्धबृद्धालगायतका व्यक्तिहरुसंगबाट श्रेष्ठले रकम लिएका छन् ।
श्रेष्ठले विभिन्न व्यक्तिबाट ५० हजारदेखि २५ लाख रुपैयाँसम्म रकम लिएको स्थानीय गोपाल शर्माले बताउनुभयो । श्रेष्ठले रकम लेनदेन गरेका ब्यक्तिहरुसंगको केही कागज सैनामैना नगरपालिका वडा नंं. ४ को वडा कार्यालयले नै गरिदिएको छ ।
मुर्र्गियामा रहेका श्रेष्ठका दुई घर यही चैत ५ गते देवीप्रसाद श्रेष्ठ र मिनप्रसाद श्रेष्ठले आफूहरुले किनेको दावी गरेपछि र फेन्सी पसल समेत अर्कैले सञ्चालन गरेको देखेपछि सोधखोज गर्दा उत्तमबहादुर आफ्नो चारजनाको परिवारसहित अघिल्लो दिन नै भागेको जानकारी भएको हो । सबै सम्पत्ति बेचेर परिवारसहित सम्पर्कविहीन भएपछि पीडितहरुले उत्तमबहादुरलाई खोजी गरिदिन इलाका प्रहरी कार्यालय रन्यौरामा निवेदन दिएका छन् । पीडितहरु जिल्ला प्रशासन कार्यालय, इलाका प्रहरी कार्यालय बुटवल र प्रदेश प्रहरी कार्यलयमा निवेदन दिने तयारीमा रहेको श्रेष्ठबाट पीडित मध्येका गोपाल शर्माले बताउनुभयो ।
तमसुक, बाउन्स चेक र अन्य कागजपत्र सहित पीडितहरुले उत्तमबहादुरले विक्री गरेको घर अगाडी प्रदर्शन गर्दै प्रहरी प्रशासनले निजलाई पक्राउ नगरेसम्म आन्दोलन जारी राख्ने बताएका छन् । उनीहरुले ऐलानी जग्गाको घर विक्री गर्दा वडा अध्यक्ष र सैनामैना नगरपालिकाका जनप्रतिनिधि र कर्मचारीले मिलेमतो वा गल्ती गरेको आशंका गर्दै छानवीन गर्न समेत माग गरेका छन् । इलाका प्रहरी कार्यालय रन्यौराका प्रमुख प्रहरी निरीक्षक मनोजकुमार श्रेष्ठले उत्तमबहादुर श्रेष्ठलाई खोजी गरिदिन निवेदन आएको तर लेनदेनको विषय भएकाले आफूले प्रकृयागतरुपमा केही गर्न नमिलेपनि व्यवहारिक हिसाबले खोजी गरिरहेको बताउनुभयो । ठगीको आरोप लागेका उत्तमबहादुर र उनका परिवारका सदस्य कसैको पनि मोबाइल फोनमा सम्पर्क हुन सकेको छैन ।
