बुटवल, ७ चैत । नेपाली काँग्रेसका तत्कालीन सभापति तथा पूर्व प्रधानमन्त्री गिरिजाप्रसाद कोइरालाको दशौं स्मृति दिवस आज मनाइँदैछ ।
स्मृति दिवसको अवसरमा नेपाली काँग्रेस, जीपी कोइराला फाउण्डेशनलगायत संस्थाले विभिन्न कार्यक्रम आयोजना गरेका छन् । पाँच पटक प्रधानमन्त्री बन्नुभएका कोइरालाको ८५ बर्षको उमेरमा २०६६ साल चैत ७ गते निधन भएको थियो ।
सङ्घीय लोकतान्त्रिक गणतन्त्रका नायकका रुपमा स्थापित कोइरालाको जन्म वि.सं. १९८१ मा भारतमा भएको थियो । कोइराला परिवार जहानियाँ राणाशासनको विरोध गरे बापत भारतको विहार राज्यको टेडी, सहर्षामा निर्वासित जीवन बिताइरहेको समयमा उहांको जन्म भएको हो । कृष्णप्रसाद कोइरालाकी कान्छी पत्नी दिव्या कोइरालाका कान्छा छोरा गिरिजाप्रसादको पूरै जीवन राजनीतिमै बित्यो ।
युद्धकालमै माओवादीसँग राजतन्त्रविरुद्ध सहमति गरेपछि काँग्रेसभित्रै समेत कोइरालाको कडा आलोचना भयो तर कोइरालाको व्यक्तित्वका अगाडि त्यो विरोध गौण बन्यो । पहिले संवैधानिक राजतन्त्रका समर्थक कोइरालाले नै झण्डै अढाइ सय वर्ष पुरानो राजतन्त्रविरुद्ध आन्दोलनको अगुवाइ गर्नुभयो । उहाँले १० वर्ष लामो सशस्त्र युद्ध गरेको तत्कालीन नेकपा (माओवादी) लाई शान्ति प्रक्रियामा ल्याउन महत्वपूर्ण भूमिका र नेतृत्व प्रदान गर्नुभयो ।
