कावासोतीमा बस पल्टिदा नेपाली सेनाका १७ जना घाइते

रामकुमार श्रेष्ठ
नवलपरासी, २८ मंसिर । पूर्वी नवलपरासीको कावासोती ३ पुरानो कावासोती बजारमा नेपाली सेना बोकेको बस दुर्घटना हुँदा १७ जना घाइते भएका छन् ।
सुर्खेतबाट काठमाडौं जाँदै गरेको नेपाली सेनाको टोली बोकेको ना ६ ख ४०४ नम्बरको बस शनिबार विहान ३ बजेतिर दुर्घटनामा परेको हो ।
बस अनियन्त्रित भई सडकबाट तल खसेको जनाइएको छ । बस दुर्घटनामा परी १७ जना नेपाली सेनाका जवान घाइते भएकोमा २ जनाको अवस्था गम्भीर रहेको जनाइएको छ ।
घाइतेहरुको मध्यविन्दु जिल्ला अस्पताल र कालीगण्डकी अस्पतालमा उपचार भएको छ । गम्भीर घाइते प्रेमबहादुर खत्री र विरेन्द्र शाहीलाई थप उपचारका लागि चितवन पठाइएको छ ।
नेपाली सेनामा भर्ना छनौटबाट छनौट भएर तालिमका लागि टोलीलाई काठमाडौं लैजाँदै गर्दा बस दुर्घटनामा परेको हो । ३ वटा बससँगै रहेकोमा एउटा बस दुर्घटनामा परेको हो । बसमा ४० जना नेपाली सेना सवार रहेका थिए ।