अर्घाखाँची, ६ मंसिर । अर्घाखाँचीको पोखराथोकका एक ८४ वर्षीय वृद्धले विद्यालयलाई ११ रोपनी जग्गा तथा बृद्ध भत्ता बापतको रकम दान गरेका छन् । जिल्लाको पाणिनी गाउँपालिका २ पोखराथोक रयलेका रविलाल नेपालीले चौरासी पूजाका अवसरमा विद्यालयलाई जग्गा दान गर्नुभएको हो । उहांले चौरासी पूजामा फजुल खर्च नगरी बालबालिकालाई शिक्षाको ज्योति फैलाउने उद्देश्यले विद्यालयलाई जग्गा तथा रकम दान गरेको बताउनु भयो ।
उहांले पाणिनी गाउँपालिका ३ खिदिममा आफ्नै नाममा रहेको ११ रोपनी जग्गा र नगद पाँच हजार रुपैयाँ पाणिनी २ पोखराथोकको रयलेमा रहेको चित्ररम्भा आधारभूत विद्यालयलाई प्रदान गर्नुभयो । चौरासी पूजामा खर्च नगरी विद्यालयलाई दान दिएको वृद्ध नेपालीले बताउनुभयो ।
विद्यालयमा एक कार्यक्रमका बीच उक्त जग्गाको लालपूर्जा नेपालीले वडाअध्यक्ष नेत्रप्रसाद भट्टराई र विद्यालय व्यवस्थापन समितिका अध्यक्ष गुणनिधि गैरेलाई हस्तान्तरण गर्नुभएको हो ।
सो अवसरमा बोल्दै वडाअध्यक्ष भट्टराईले एक दलित परिवारको वृद्ध मानिसले मन ठू्लो बनाएर विद्यालयलाई जग्गा दान गरेर सिंगो समाजका लागि उदाहरणीय काम गर्नु भएको छ भन्दै उहांले यस बाट हामी सबैले सिक्न जरुरी छ भन्नुभयो । यो सहयोगले विद्यालयको विकासमा उल्लेखनीय भूमिका खेल्ने उहांले बताउनु भयो ।
कार्यक्रममा शिक्षक अभिभावक संघका अध्यक्ष माधव गौतम, समाजसेवी रामचन्द्र गौतम, विद्यालयका प्रधानाध्याक रामकुमार छिनाललगायतले दानविर नेपालीको प्रशंसा गर्नुभएको थियो ।
