ट्रकको ठक्करबाट मोटर साईकल चालकको मृत्यु

भैरहवा, ९ कार्तिक । भारतीय नम्वरको लहरी ट्रकले ठक्कर दिदा रुपन्देहीमा एक जनाको मृत्यु भएको छ । ओमसतिया गाउँपालिका ४ बसन्तपुर भैरहवा परासी हुलाकी सडकमा पश्चिमबाट पूर्व तर्फ जांदै गरेको एन एल ०१ डी ४७०८ नम्वरको लहरी ट्रकले सोही दिशातर्फ जांदै गरेको मोटर साईकललाई ठक्कर दिएको प्रहरीले जनाएको छ ।
ट्रकले लु ४७ प ८९०५ नम्वरको मोटर साईकललाई ठक्कर दिदा मोटर साईकल चालक ओमसतिया गाउँपालिका बस्ने बर्ष २० को बलाराम चाईको घटनास्थलमै मृत्यु भएको र पछाडी सवार बर्ष १८ को आकाश गुप्ताको खुट्टा र छातीमा चोट लागि घाईते भएकाले भीम अस्पताल भैरहवामा उपचार भैरहेको छ ।
मोटर साईकलको पेट्रोल ट्याँकी फुटी आगलागी हुंदा मोटर साईकल समेत जलेर पुर्ण नष्ट भएको छ भने ट्रकको पछाडीको ४ वटा टायर जलेकाले दमकलको सहयोगमा आगो नियन्त्रणमा लिएको प्रहरीले जनाएको छ । ट्रक चालक प्रहरी नियन्त्रणमा रहेको छ ।